Ermənistan parlamentində 44 günlük müharibənin nəticələrini araşdıran komissiyanın ilk iclası qalmaqalla yada qalıb.

Publika.az xəbər verir ki, müxalif “Ermənistan” və “Mənim şərəfim var” bloku araşdırmanın obyektivliyinə şübhə ilə yanaşır.

“Mənim şərəfim var” blokunun deputatı Tiqran Abramyan deyib ki, müharibə zamanı baş verənlərin əsas məsuliyyəti hakimiyyətin üzərinə düşür: “İndi hakimiyyət özü komissiya yaradıb, araşdırma aparmaq istəyir və bunun obyektiv olması mümkün olmayacaq. Komissiyaya müstəqil şəxslər rəhbərlik etməlidir”.

Hər iki müxalif blok komissiyasının iclasında iştirakdan imtina edərək, zalı tərk edib.

“Ermənistan” blokunun deputatı Qeqam Manukyan deyir ki, onlar iclası tərk etsələr də, komissiyaya qayıtmaq hüququnu özlərində saxlayırlar.

Komissiyanın rəhbəri, hakim fraksiyanın deputatı Andranik Koçaryan fərqli fikirlərə hörmətlə yanaşdıqlarını, gələcəkdə müxalif blokların da prosesdə iştirakına baxa biləcəklərini deyib.

Komissiyanın iclasından sonra Koçaryan jurnalistlərə açıqlamasında bildirib ki, baş nazir Nikol Paşinyan da Komissiyaya dəvət olunacaq.

“Bunu baş nazirin özü istəyir. Müxalifət baş nazirə maraqlandıqları sualları vermək imkanını itirib”, - o bildirib.

Koçaryan Komissiyanın rəyində Paşinyanın məsuliyyətinin göstərilib-göstərilməyəcəyi sualına cavabında deyib ki, bu, araşdırmanın nəticələrindən sonra bəlli olacaq.