Azərbaycan həm döyüş, həm də siyasi arenada zəfər qazanmaqla gücünü dosta da, düşmənə də göstərdi. Humanitar məqsədlərlə elan olunan atəşkəsdən sonra Ermənistanda tamamilə fərqli mənzərə müşahidə olunur. İnsanlar xof və ümidsizlik içindədir, sabaha inamları qalmayıb. Ermənistan qoşunlarının isə Kəlbəcər və Laçından çıxarılması davam edir. Qələbəni qeyd edən Azərbaycan xalqının ağlında bir sual var: Erməni ordusu Xankəndidə qalacaqmı? Hərçənd ki, hələ də Xankəndidə Ermənistan silahlı birləşmələri var və onların nə zaman oradan çıxarılacağı ilə bağlı heç bir müddəa yoxdur. Bu məsələ hansı formada həllini tapacaq?

Bu barədə "Correct.az"a açıqlama verən politoloq Məhəmməd Əsədullazadə bildirib ki, Azərbaycan ərazilərində olan qeyri-qanuni birləşmələrin ləğv olunmasını Rusiyadan tələb edəcək: "Noyabr ayının 10-da Azərbaycan, Ermənistan və Rusiya liderlərinin birgə imzaladığı bəyanatda erməni silahlı birləşmələrinin Azərbaycan ərazisindən çıxarılması qeyd olunur. Qarabağda özünümüdafiə adlı dırnaqarası hərbi birləşmələr var, onlar Ağdərə, Xocalı və Xankəndində qalmalıdır. Rusiya prezidenti Vladimir Putin qeyd etdi ki, status-kvo qalacaq. Əgər status-kvo qalarsa, burada müəyyən idarəetmə mərkəzi də qalır. Xankəndində əvvəlki rejimin müəyyən istiqamətdə fəaliyyəti ola bilər. Düşünürəm ki, Kəlbəcər və Laçın boşaldıldıqdan sonra Türkiyə və Azərbaycan aktiv diplomatik hərəkətə keçərək yerli hərbi birləşmələrin ləğv olunmasını tələb edəcək. Burada ermənilərin silahlı birləşmələri yoxdur, Paşinyan onları geri çağırıb, amma qeyri-qanuni yerləşən hərbi birləşmələr var ki, onları da mütləq zərərsizləşdirmək lazımdır.

Azərbaycan Rusiyadan belə bir qrupun ləğv edilməsini tələb edəcək. Yoxsa münaqişə alovlana, hərbi birləşmələr Azərbaycana qarşı silahlana bilərlər. Onların fəaliyyəti Azərbaycanın təhlükəsizliyinə təhdiddir. Rusiya bunda maraqlı ola bilər. Lakin mütləq şəkildə Azərbaycan və Türkiyə bunun qarşısını alacaq".