Təəssüf ki, miomalar qadınlarda hamilə qalmaq şansını azaldır.

Məsələ burasındadır ki, miomalar (xüsusilə böyük ölçüdə olanlar) uşaqlıq boşluğunu deformasiya edir, uşaqlıq borularını sıxır və nəticədə spermatozoidlərin hərəkətini çətinləşdirir. Bundan əlavə mioması olan qadınlarda bir çox hallarda hormonal fon pozulmuş olur ki, bunun nəticəsində qadında ovulyasiya baş verməyə bilər. Sadaladığımız amillər qadında sonsuzluğa gətirib çıxara bilər.

Lakin uşaqlığın əzələ qatında yerləşən kiçik miomalar adətən hamiləliyin baş verməsinə və onun gedişatına mane olmur.

Ailehekimiklinikasi.az saglamolun.az-a istinadən xəbər verir ki, həkimlər mioması olan qadınlara hamiləliyin planlaşdırılması mərhələsində miomanı müalicə etmək və ya bəzi hallarda hamiləlikdə əvvəl miomanı xaric etmək tövsiyə edirlər. Miomanın xaric olunmasından 6 ay sonra qadın hamiləliyi planlaşdıra bilər.

Bəzi hallarda mioma məhz hamiləlik zamanı qadında aşkar olunur. Bu halda qadın bilməlidir ki, mioma hamiləliyin gedişatına mənfi təsir edə bilər - hamiləliyin pozulmasına, ciftin çatışmazlığına və s. səbəb ola bilər.

Miomatoz düyünlər uşaqlığın tonusunun artmasına səbəb ola bilər ki, nəticəsində dölsalma baş verə bilər. Əgər cift miomaya yaxın yerləşmiş olarsa, bu onun normal inkişafını poza bilər ki, nəticədə cift vasitəsilə qidalı maddələrin və oksigenin dölə çatdırılması olduqca çətinləşir, döldə hipoksiya (oksigenin çatışmazlığı) inkişaf edə bilər. Bəzi hallarda ciftin miomaya yaxın yerləşməsi onun qopmasına səbəb ola bilər.

Belə pozulmaların inkişafı riski bu kimi hallarda artır:

- mioma böyük olduqda (7 sm-dən artıq),

- mioma uşaqlıq boynuna yaxın yerləşdikdə,

- qadında bir neçə miomatoz düyün olduqda,

- cift miomaya yaxın yerləşdikdə.

Təəssüf ki, heç bir həkim və heç bir müayinə miomanın hamiləlik zamanı "özünü necə apardığını" dəqiq proqnozlaşdıra bilməz. Mioma hamiləlik zamanı böyüyə və ya əksinə kiçilə bilər, onun ölçüləri dəyişməyə bilər. Miomanın ölçüləri hamiləlik zamanı sürətlə böyüdükdə, uşaqlıq boşluğunda "darısqallıq" yaranır ki, nəticədə dölsalma baş verə bilər.

Mioması olan qadın hamiləliyin əvvəlindən sonuna kimi həkimlərin nəzarətində olmalı, fiziki gərginliklərdən və streslərdən uzaq olmalı, kifayət qədər yatmalı və dincəlməlidir, tam dəyərli qidalanmalıdır.

Mioması olan qadında doğuş zamanı bəzi ağırlaşmalar (doğuş fəaliyyətinin zəif olması, ciftin uşaqlıq boşluğundan tam çıxmaması və s.) inkişaf edə bilər. Düyün uşaqlıq boynuna yaxın yerləşdikdə, təbii doğuş mümkünsüz ola bilər və qadına qeysəriyyə kəsiyi əməliyyatı təyin oluna bilər.