"Son günlər ölkəmizdə koronavirusa yoluxma saylarının artması hər kəsdə narahatlıq yaradır və böyük sual doğurur: COVID-19 gerimi qayıdır? Verilən rəqəmlərə əsasən müəyyən olunub ki, bir sıra Avropa ölkələrində, həmçinin ölkəmizdə yoluxma sayında ciddi artım var".

Bunu Publika.az-a açıqlamasında həkim-terapevt Selcan Qafarlı deyib.

Onun sözlərinə görə, Ümumdünya Səhiyyə Təşkilatı (ÜST) pandemiyanın hələ bitmədiyi və yeni ştamların meydana çıxması ilə əlaqədar insanları xəbərdar edir: "Keçən 2 həftədə yoluxma sayında olan 30% artım hamını narahat edir. ÜST insanları tədbirli olmağa çağırır. Hazırda aktiv xəstə sayını ciddi şəkildə artıran Omikronun alt variantı B.A.2.75 mutasiyasıdır. Yeni mutasiyanın Omikronun yüksək bulaşdırıcılığına, Deltanın da ağır gedişinə səbəb olan xüsusiyyətləri daşıdığı məlum olub. Əvvəl COVID-19 keçirmiş insanlara yenidən yoluxabilmə ehtimalı da var".

Həkim xəbərdarlıq edib ki, risk qrupunda və 60 yaş üzəri olan pasientlərdə yeni mutasiyalar daha ağır keçə bilər: "Bununla əlaqədar virus pandemiyasının bitdiyini düşünüb tədbirləri bir kənara qoymaq olmaz. Şəxsi gigiyena, sosial məsafə və maska qaydalarına əməl etməli, bacardıqca insan sayı çox olan məkanlardan uzaq durmalıyıq".

S.Qafarlı qeyd edib ki, peyvənd olunmuş insanlarda Omikronun yeni ştammlarının daha xəfif seyr etməsi müşahidə edilir: "Yeni mutasiyaların meydana çıxması ilə birlikdə sentyabr və oktyabr aylarında yeni peyvəndlərin gətirilməsi güman olunur. Unutmayaq ki, biz insanlar virusdan daha güclüyük, qeyd etdiyim tədbirlərlə bu virus pandemiyasını da dəf edə bilərik".