Dünya Səhiyyə Təşkilatı iltihab əleyhinə qlükokortikosteroid deksametazonun koronavirus infeksiyasına yoluxmuş ağır xəstələrinin müalicəsində effektiv olması barədə Oksford Universitetinin apardığı tədqiqatın ilkin nəticələrini alqışlayıb.

AZƏRTAC bildirir ki, tədqiqatçıların sözlərinə görə, deksametazonun istifadəsi ağ ciyərlərin süni nəfəs aparatına qoşulmuş xəstələrdə ölüm hallarını 35 faiz, oksigen müalicəsi alan pasiyentlərdə isə 20 faiz azaldır.

Dünya Səhiyyə Təşkilatının Baş direktoru Tedros Adhanom Qebreyesus bu metodun ağır koronavirus xəstələrinin ölüm hallarını azaldan ilk müalicə sxemi olduğunu deyib. "Bu əla xəbərdir və mən Böyük Britaniya hökumətini, Oksford Universitetini, həmçinin insan həyatını xilas edən elmi irəliləyişdə əməyi olan Britaniyanın çoxsaylı xəstəxanalarını və pasiyentləri təbrik edirəm", - deyə, o bildirib.

1960-cı illərdən bütün dünyada əlçatan olan deksametazonun bir qutusunun qiyməti Böyük Britaniyada 5 funt sterlinqdir.

Tədqiqatçıların sözlərinə görə, preparat COVID-19 xəstələrində koronavirusun səbəb olduğu immun hiperaktivliyinin orqanizmə vurduğu zərəri azaldır. Xəstələrdə müalicə kursunun 10 gün davam etməsi nəzərdə tutulur.

Deksametazon 2 min xəstə üzərində sınaqdan keçirilib və onların vəziyyəti preparat qəbul etməyən 4 min pasiyent ilə müqayisə edilib.

Qeyd edək ki, bir qədər əvvəl Dünya Səhiyyə Təşkilatı COVID-19 xəstəliyi ilə mübarizədə malyariya əleyhinə hidroksixloroxin preparatının istifadəsindən imtina etmiş, lakin onun insan orqanizminə zərəri araşdırıldıqdan sonra sınaqlar bərpa olunmuşdu. Həmçinin koronavirus infeksiyasının virus əleyhinə remdesivir preparatı ilə müalicəsinə də cəhd edilmişdi.