Braziliyanın bir neçə şəhərinin sakinlərinə ölkənin Milli Mülki Müdafiə qurumu adından yadplanetlilərin hücumu ilə bağlı xəbərdarlıq bildirişləri gəlib.

Publik.az “Agência Brasil”ə istinadla xəbər verir ki, bu barədə Müdafiə və Mülki Müdafiə məsələləri üzrə katib Volney Volf məlumat verib.

Katibin sözlərinə görə, dövlətin əhalini təcili xəbərdar etmə sisteminə haker hücumu olub. Nəticədə, ölkə sakinlərinə özlərini yadplanetlilərin hücumundan "qorumağa" çağıran bildirişlər daxil olub. Üstəlik, bəzi mesajlarda orfoqrafik səhvlərə də yol verilib.

"Ehtiyatlı olun: yadplanetlilərin hücumu. İnsanlar, biz gəldik", — deyə mesajların birində qeyd olunub.

Braziliyanın Milli Mülki Müdafiə qurumu "Facebook" sosial şəbəkəsində bildirib ki, haker hücumundan sonra xəbərdarlıq sistemi söndürülüb. Xəbərdarlıqlar qurumla heç bir əlaqəsi olmayan şəxs tərəfindən məsafədən göndərilib.