Titanik gəmisində tapılan əşyaların saxlandığı gizli anbar və onların sahiblərinin hekayələri araşdırılıb.

Teleqraf.com xarici mətbuata istinadla xəbər verir ki, araşdırmada anbarın dəqiq yerinin gizli saxlanıldığı açıqlanıb.

Çünki içərisində olan bəzi əşyalar çox qiymətlidir:

“Lakin onun ABŞ-ın Corcinya ştatının paytaxtında yerləşdiyini deyə bilərik. Anbarın içərisində aşmış vanna və çökmüş illüminatordan (gəminin kabinəsindəki dairəvi pəncərə) köhnəlmiş şüşə qablara və kiçik düymələrə qədər minlərlə əşya var. Timsah dərisindən hazırlanmış çanta Atlantik okeanın şimalındakı suyun dərinliklərində onilliklər boyu toxunulmaz qalıb. Çantanın içərisində saxlanılan bəzi əşyalar sahibini tapmağı asanlaşdırıb. Çanta gəminin ən ucuz hissəsində səyahət edən Marian Meanwell adlı qadına məxsusdur. Dağıntılar altından bu qiymətli əşyaları çıxaran “RMS Titanic” şirkətinin kolleksiya meneceri Tomasina Rey deyir: "Bu gözəl çanta 63 yaşlı qadına məxsusdur. Həyat yoldaşını yeni itirən qadın qızı ilə ABŞ-a gedirdi. Çantanın içərisindəki əşyaları arasında Marian Meanwellin anasına aid olduğu güman edilən solğun bir fotoşəkil də var. Meanwellin çantasından ABŞ-da yeni həyatına hazırlaşarkən özü ilə apardığı bəzi sənədlər də tapılıb.

O, Titanikin batması nəticəsində həyatını itirən 1500 nəfərdən biri oldu”.

Araşdırmada dərinliklərdən çıxarılan əşyaların bəzilərinin gəmidən sağ çıxanlara aid olduğu qeyd olunur:

“İçərisində kiçik ətir şüşələri olan plastik qabdan açanda güclü, şirin bir qoxu yayılır. Onilliklərdir dəniz səthində qalan bu qapaqlı qablardan çıxan qoxular hələ də çox kəskindir. Gəmidə bu kiçik ətir şüşələrindən 90-dan çoxunu özü ilə aparan bir ətir taciri də var idi. Adı Adolf Saalfeld olan şəxs ikinci dərəcəli kabinlərdə səyahət edirdi. Saalfeld sağ qalan 700 nəfərdən biri olub. 1912-ci ildə Titanik aysberqə çırpılaraq batdıqda gəmi parçalandı və içindəkilər ətrafa səpələnərək böyük bir dağıntı sahəsi yaratdı. Tomasina deyir ki, gəmi mətbəxdən ayrıldığı üçün okeanın dibində çoxlu butulkalar və mətbəx qabları var idi. Həmin vaxt gəmidə minlərlə şampan şüşəsi daşınırdı. Kruiz gəmisinin sahibi birinci dərəcəli sərnişinlərin qlamur və ən yaxşı yemək və içkilərlə zəngin təcrübəyə sahib olmasını istəyirdi. Gəmi üzən saray kimi idi və Titanik ən dəbdəbəli kruiz gəmisi olmaq üçün nəzərdə tutulmuşdu. Tomasinaya görə, gəminin niyə batdığını dəqiq başa düşmək üçün hələ çox şey öyrənilməlidir. 1994-cü ildə ABŞ-da məhkəmənin verdiyi icazə ilə “RMS” Titanicin qanuni dağıntılar altından əşyaları çıxarmaq hüququna malik yeganə şirkəti olub”.