Əgər uşağınızın dırnaqlarında cizgilər, yumşalma və tez-tez qırılmalar görürsünüzsə və ya dırnaqların ətrafında ziyillər varsa, bütün bu hallar müxtəlif xəstəliklərin əlaməti ola bilər.

Milli.Az aztibb.az-a istinadən bildirir ki, yetkinlərdə olduğu kimi, körpələrdə və uşaqlarda dırnaqlar bir çox sağlamlıq problemlərinin siqnallarını verə bilər. Bu səbəbdən körpələrdə və uşaqlarda ümumi müayinə zamanı dırnaqların da müayinəsi vacibdir.

Dırnaqların inkişafı körpənin ana bətnində olduğu 9-cu həftədən başlayır və beşinci aya qədər davam edir.

Uşaqlarda dırnaq xəstəlikləri anadangəlmə və ya daha sonra baş verə bilər. Körpə ilk dünyaya gələndə edilən ilk müayinədə anadangəlmə xəstəliklər fərq edilə bilər. Bu, sindromlu vəziyyəti və ya orqan sistemlərini əhatə edən bir xəstəliyi göstərə bilər.

Qazanılmış dırnaq xəstəlikləri böyüklərdəki kimi olsa da, bəzi fərqlər ola bilər. Xalq arasında dırnaq göbələyi kimi tanınan onikomikoz və dırnaq şişləri buna misal ola bilər.