"Facebook"dan intensiv istifadə edən insanlarda psixoaktiv maddələrdən asılı olan xəstələrdə olduğu kimi beynin badamcıq sahəsində boz beyin materialının həcminin azalması müşahidə edilib.

Publika.az Türkiyə mətbuatına istinadla xəbər verir ki, türkiyəli uzman Alptekin Çetin bu istiqamətdə araşdırma aparıb.

O bildirib ki, "Facebook"dan mütəmadi istifadə beynin badamcıq sahəsinə təsir edir:

"Yaddaş problemləri, unutqanlıq, düşünmə qabiliyyətinin itirilməsi kimi klinik nəticələr gündəlik həyata mənfi təsir göstərə bilər. İnsanın kompüter və ya smartfon arxasında gününün çox hissəsini sosial media hesablarında keçirmə istəyi çoxdur. Əgər o, bu istəyinə qarşı çıxa bilmirsə, həyatı üçün təhlükəli olan alüdəçiliklə üz-üzə qalır. Sağlamlığı risk altına düşür".