Oksidativ stress dermatit, urtikariya və psoriaz kimi dərinin allergik və iltihabi xəstəliklərinin inkişafında mühüm rola malikdir. Sübut olunub ki, ətraf mühitin intensiv çirklənməsi və Stratum corneum-un (dərinin buynuzlu qişası) qoruyucu funksiyasının oksidativ stress nəticəsində pozulması atopik dermatitlərin artmasına və onun sənaye bölgələrində müalicəyə qarşı rezistent olmasına səbəb olur. Dəri örtüyündə sərbəst radikallarla törədilmiş protein sintezinin pozulması xəstəliklərin ağır gedişatını, əsasən də xroniki xəstəlikləri və onların kəskinləşməsini izah edir.

"Medicina" xəbər verir ki, dəri xəstəlikləri zamanı oksidativ pozulmalar tək dəri örtüklərini əhatə etmir (məs., psoriazda olduğu kimi), eritrosit və plazmanın digər kompo-nentlərində də dəyişikliklər müşahidə olunur.

Vitamin C dərinin baryer funksiyasında mühüm rol oynayır. Atopik dermatit və psoriazlı xəstələrin dərisində vitamin C-nin konsentrasiyası xeyli azalmış olur. Oksigenin aktiv molekullarının ekspozision təsirindən (məs., ozon səviyyəsinin yüksəl¬məsi) dərinin üst qatında vitamin C-nin səviyyəsi 2 dəfədən çox azalır. Yağda həll olan antioksidantların (vit.E, ubixinon) səviyyəsi tez normallaşırsa, suda həll olan vitamin C və qlütation kimi anti- oksidantların bərpası, əksinə, 70-120 saat ərzində baş verir.

Dəri örtüyünün effektiv qoruyucu funksiyası neyroimmun proseslər vasitəsilə həyata keçir; vitamin C sinir və immun sistemində bir çox biokimyəvi reaksiyaların kofaktoru olub, hüceyrələri oksidativ stresdən qoruyur. Buna görə də sinir və immun hüceyrələrində vitamin C-nin konsentrasiyası yüksəkdir. Məhz bu səbəbdən vitamin C-nin fizioloji səviyyəsinin bərpası dermatoloji xəstəliklərin uğurlu müalicəsinə zəmin yaradır, çünki o yaraların sağalmasında və infeksiyaların profilaktikasında mühüm rol oynayır.

Neyrodermit zamanı oksidativ stress qüsurlu dövran yaradır.

Toxumaların zədələnməsi, sinir və immun sistemlərinin funksiyalarının pozulması dəri baryerinin itirilməsinə, həmçinin dəri infeksiyalarına səbəb olur. Bu amillər oksidativ stresi dərinləşdirərək qüsurlu dövran yaradırlar.