Çəkinin artmasına səbəb olan amillərdən biri də hormonal pozğunluqdur. Hormonal pozğunluqların arxasında isə bir çox hallarda qalxanabənzər vəzinin xəstəlikləri dayanır.

Milli.Az xəbər verir ki, bu barədə "Gazeta.ru"ya müsahibəsində endokrinoloq, diyetoloq Elvira Binətova danışıb.

"Çox vaxt qalxanabənzər vəzinin xəstəlikləri metabolik pozğunluqlarla müşayiət olunur ki, bu da artıq çəkiyə səbəb olur. Bundan başqa, qalxanabənzər vəzi xəstəlikləri ilə yanaşı, əhval-ruhiyyənin aşağı düşməsi, apatiya, depressiya, dəri quruluğu kimi digər əlamətlər də qeyd olunur. Həmçinin ödem də ola bilər. Buna görə də bədən çəkisi artır və şişkinlik baş verir, şişkinlik ilk növbədə dodaqlar, qollar və ayaqlarda hiss olunur.

Bundan əlavə, bu cür xəstəliklər ürək döyüntüsünün azalması, qan təzyiqi və xolesterin səviyyəsinin bir qədər artması ilə xarakterizə olunur. Çəkiyə təsir edən başqa bir hormon, beynin hipofiz vəzində istehsal olunan prolaktin adlanır. Menstruasiyanın pozulması, qadınlarda sonsuzluğun inkişafı və süd vəzilərindən axıntı, kişilərdə isə testosteronun azalması və cinsi funksiyanın pozulması bu hormonla bağlı problemləri göstərən əsas əlamətlərdir.

Adrenal korteksdə əmələ gələn kortizol da çəkiyə təsir edə bilər. Bu hormonun sintezinin pozulması qan təzyiqi və qanda qlükoza səviyyəsinin artması, həmçinin piylənmə ilə müşayiət olunur. Kortizol istehsalının pozulmasının xarakterik əlaməti qarın piylənməsidir, bu zaman artıq visseral piylərin yığılması əsasən qarın nahiyəsində baş verir, əzalar isə nisbətən nazik qalır. Həmçinin, qarın və ətraflarda çatlaq izləri müşahidə edilə bilər", - həkim bildirib.

Ekspert bildirib ki, cinsi hormonların pozğunluğu həm qadınlarda, həm də kişilərdə maddələr mübadiləsinə əhəmiyyətli dərəcədə təsir göstərir.

"Qadınlarda bu, ilk növbədə estradioldur (estrogen qrupundan olan əsas hormon). Qadın hormonları normal səviyyədədirsə, maddələr mübadiləsi yaxşı işləyir, lakin onların istehsalının azalması xüsusən də menopoz dövründə baş verir. Odur ki, menopozdan sonrkı ilk beş ildə çəkinin sürətli artımı müşahidə olunur", - endokrinoloq izah edib.

Kişilərdə də testosteron səviyyəsi çəkiyə təsir göstərir. Hormon səviyyəsinin azalması çəkinin artmasına səbəb ola bilər. Həkimin sözlərinə görə, piylənmənin qarşısını almaq üçün tədbirlərə riayət etmək çox vacibdir: qidalanmaya nəzarət edin: fəstfud, şəkərli içkilər, sürətli həzm olunan karbohidratlardan imtina edin, həmçinin daha çox hərəkət edin. Həkim xatırladıb ki, ÜST-ün tövsiyələrinə əsasən, insan gündə ən azı 10 min addım atmalıdır. (publika.az)