Ümumdünya Səhiyyə Təşkilatının 2015 ildə dərc olunmuş məlumatlarına əsasən bütün dünyada yaşayan 3,7 mlrd. insanda herpes virusu var.

Saglamolun.az xəbər verir ki, bu dünyada yaşayan insanların təxminən 67%-ni təşkil edir.

Dəyişkən havada (isti günlər soyuq günlərlə növbələşdikdə və əksinə) doqaqlarda herpes səpgiləri olan insanların sayı çoxalır. İnsanların əksər hissəsi bu infeksiya haqda bixəbərdir və ya onların herpeslə bağlı yanlış məlumatları var. Bu məqalədə biz herpeslə bağlı olan bəzi yanılmaları sizə təqdim etmək istərdik.

1. Herpes keçici deyil.

Bu yanılmadır. Təbii ki, xəstəliyin kəskinləşməsi zamanı (dodaqlarda səpgilər olduqda) yoluxmanın ehtimalı artır. Lakin hətta gizli formada keçən bu infeksiya (səpgilər və s. yoxdur) bir insandan digərinə çox asanlıqla keçir. Herpes bir insandan digərinə öpüşmə, eyni qab-qacaq, pomada və s. ilə istifadə etdikdə, cinsi yolu ilə keçə bilər. Həmçinin körpə doğuş yollarından keçdikdə anadan da yoluxa bilər.

2. Herpes soyuqdəymənin əlamətidir.

Bu da yanılmadır. Herpes müstəqil bir xəstəlikdir. Bu xəstəlik sədə herpes virusu tərəfindən törədilir. Herpesin bir neçə növü var.

Bu virus əsasən soyuqdəymə, bəzən isə güclü stress, yorğunluq və immunitetin istənilən səbəbə görə zəiflənməsi nəticəsində kəskinləşə bilər.

3. Soyuqdəymə zamanı səpgilər əmələ gəlibsə, insan sağalır (xəstəlik "çölə çıxır").

Əksinə bu o deməkdir ki, xəstəlik insanın immunitetini zəiflədib və nəticədə herpes infeksiyası orqanizmdə "oyanıb".

4. Səpgilər keçibsə, herpes də keçib.

Təəssüf ki, bu belə deyil. İnsan herpesə yoluxubsa, virus onun orqanizmində ömrünün sonuna kimi qalacaq.

5. Herpes səpgilərini müalicə etmək üçün onları yod, "zelyonka", spirt kimi vasitələrlə yandırmaq lazımdır.

Əksinə bunu etmək olmaz. Nə yod, nə də zelyonka herpesə təsir etmir. Bu üsulla siz yalnız dərinizi yandıracaqsınız. Herpesin yüngül formalarında müalicə üçün xüsusi dərman "atsiklovir" (məlhəm şəklində) istifadə olunur. Səpgilər tez-tez əmələ gəlirsə, immun sisteminin fəaliyyətini yaxşılaşdıran, ümumimöhkəmləndirici vasitələrdən istifadə olunur.

6. Herpes təhlükəli virus deyil.

Əksinə, herpes çox təhlükəli virusdur. Sadə herpes virusu sinir hüceyrələrinə daxil olur və burada yaşayır. Bu səbəbdən herpes infeksiyası sinir toxuması olan istənilən orqanlarda fəsadlar törədə bilər.

Herpesin bir neçə növləri var. Onlardan ən təhlükəsi herpes zoster sayılır. Herpes Zoster güclü ağrılara, hərarətin artmasına səbəb olur, sinirlər zədələnir və insan hətta əlil qala bilər.

Herpes virusu insanın mərkəzi sinir sistemini zədələyə bilər. Dağılmış skleroz kimi tanınan ağır sinir sistemi xəstəliyinin səbəblərindən biri herpes sayılır. Herpes ağ ciyər, gözlər, qara ciyər, bağırsaqlar, böyrəklər, daxili cinsiyyət orqanlarında xəstəliklərə səbəb ola bilər. Herpes hətta bəzi xərçəng növlərinin inkişafına təkan verə bilər. Bütün bunlar əksər hallarda insanın immun sisteminin kəskin zəifləməsi fonunda baş verə bilər. İnsanın immuniteti güclüdürsə, immun sistemi orqanizmdə yaşayan istənilən virus və mikrobların çoxalmasının qarşısını alır.