Əbül Nasir Gödək Əhməd — Ağqoyunlu dövlətinin hökmdarı.

Həyatı
Uzun Həsənin və II Mehmedin nəvəsi, Uğurlu Məhəmmədin və Gövhər sultanın oğlu idi. Uşaqlığı İstanbulda keçmişdir. Həyat yoldaşı Aynişah Sultan, oğlu Zeynalabidin bəy Bayandur olub.

Hakimiyyəti
Eybə Sultanın köməyi ilə 1497-ci ildə hakimiyyətə gəlmiş, bunun müqabilində ona Kirman vilayətini vermişdi. Kazım bəy Pörnək isə Fars vilayətini almışdı. Hakimiyyətə gələn kimi vergi islahatlarını həyata keçirməyə cəhd etmiş, iyirmiyə qədər vergi və mükəlləfiyyəti ləğv etmişdir. İqtisadiyyatın və ticarətin inkişafına maneə olan tamğa da bu sırada idi. Gödək Əhməd Osmanlıda olduğu kimi, hakimiyyəti mərkəzləşdirməyə çalışmaq, ordusunu Osmanlı tərzinə əsasən yeniləmək fikrində idi. Kazım bəy və Eybə Sultan bu islahatlardan qorxuya düşərək Muradı Şirvandan çağırdılar. Gödək Əhməd 1497-ci il in dekabrında İsfahan yaxınlığında məğlub oldu və öldürüldü.

Gödək Əhmədin ölümündən sonra Ağqoyunlu dövləti 3 yerə bölüşdürüldü:

Məhəmməd Mirzə - Yəzd və Fars vilayətlərində
Əlvənd Mirzə - Azərbaycanda[1]
Qasım Mirzə - Mardin və Diyarbəkirdə[2]