Qan şəkərinin gün ərzində tez-tez yüksəlib-enməsi halsızlıq, qəfil aclıq hissi və uzunmüddətli sağlamlıq problemlərinə səbəb ola bilər.

Medicina.az xəbər verir ki, mütəxəssislər bunu azaltmaq üçün ciddi pəhrizlərə ehtiyac olmadığını bildirilər.

Belə ki, gündəlik həyatda tətbiq edilən bir neçə sadə vərdiş qan şəkərinin daha sabit qalmasına kömək edə bilər.
1. Yeməkdən sonra 10–15 dəqiqə gəzin

Qısa gəzinti əzələlərin qandakı qlükozanı enerji kimi istifadə etməsinə kömək edir. Bu da yeməkdən sonra qan şəkərinin kəskin yüksəlməsinin qarşısını ala və həzmi yaxşılaşdıra bilər.

2. Yeməyə zülal və liflə başlayın

Yeməyə əvvəlcə salat, tərəvəz, qatıq, yumurta, balıq, ət və ya paxlalılarla başlayın. Çörək, düyü, makaron və şirniyyatları isə daha sonra yemək tövsiyə olunur. Bu, karbohidratların daha yavaş sorulmasına kömək edir.

3. Gün ərzində daha çox hərəkət edin

İdman zalına getmək məcburi deyil. Gün ərzində bir neçə dəfə 2–5 dəqiqə hərəkət etmək, pilləkən qalxmaq və ya sürətli templə gəzmək də qan şəkərinin tənzimlənməsinə və insulinə həssaslığın artmasına dəstək ola bilər.

Mütəxəssislər qeyd edirlər ki, qan şəkərinə nəzarət yalnız qidalanmadan deyil, fiziki aktivlikdən də asılıdır. Xüsusilə yeməkdən sonra 10–15 dəqiqəlik gəzinti qan şəkərinin tarazlıqda saxlanmasına kömək edən ən sadə üsullardan biri hesab olunur.