Müntəzəm və ölçülü miqdarda qəhvə qəbulunun Alzheimer,Parkinson və yaşla bağlı demensiya kimi neyrodegenerativ xəstəliklərin riskini azaltdığı bildirilir.

Milli.Az xəbər verir ki, bu barədə Qalina Çudinskaya məlumat verib.

Onun sözlərinə görə, heyvanlar üzərində aparılan təcrübələrdə kofein beynin Alzheimer xəstəliyinə bənzər zədələnmələrini ləngidib, həmçinin Parkinson xəstəliyinin modellərində və insultdan sonra yaranan koqnitiv pozuntularda yüngül qoruyucu təsir göstərib.

Nevroloq bildirib ki, bir sıra tədqiqatlar gündə 1-3 fincan qəhvə içən insanların verbal yaddaş və diqqət qabiliyyətini daha uzun müddət qoruduğunu göstərir:

"Kofeinin təsir mexanizmi onun adenozin reseptorlarını bloklaması ilə izah olunur. Bu proses neyroplastikliyi aktivləşdirir, oksidləşdirici stressi azaldır və neyronların fəaliyyətini dəstəkləyir".

Qeyd olunub ki, qəhvə yalnız kofeindən ibarət deyil. İçkinin tərkibindəki polifenollar və xlorogen turşusu antioksidant və iltihabəleyhinə təsir göstərir, kofein turşusu isə neyrogenezi stimullaşdıraraq beyin hüceyrələrini qoruyur.

Həkimin sözlərinə görə, triqonellin və diterpenlər mitoxondriləri möhkəmləndirir, stress proseslərini tənzimləyir, fenilindanlar və EHT (Eicosanoyl-5-hydroxytryptamide) isə Alzheimer xəstəliyi ilə əlaqəli zülalların yığılmasının qarşısını alır. Bütün bu komponentlər birlikdə koqnitiv funksiyaları dəstəkləyir, beynin yaşlanma prosesini ləngidir və yüngül neyroprotektiv effekt yaradır.

Nevroloq xəbərdarlıq edib ki, qəhvənin həddindən artıq qəbulu yuxusuzluq, təşviş və ürək-damar sisteminə əlavə yük yarada bilər. Sağlam böyüklər üçün təhlükəsiz gündəlik kofein dozası təxminən 4 fincan kofedir.

Lakin hamilə və süd verən qadınlar, eləcə də ürək-damar xəstəlikləri və yüksək arterial təzyiqi olan şəxslər üçün tövsiyə olunan gündəlik norma bir qədər azaldılmalıdır.