Badımcan bir çoxlarının süfrəsində tez-tez yer alan tərəvəz olsa da, çoxumuz onun sağlamlığa müsbət təsirini lazımınca bilmirik. Halbuki bu sadə tərəvəz təkcə yeməklərə dad qatmır, həm də orqanizm üçün olduqca faydalıdır.

Milli.Az xəbər verir ki, mütəxəssislərin sözlərinə görə, badımcan bədəni toksinlərdən təmizləyir, ürək-damar sistemini qoruyur, qanda xolesterinin səviyyəsini azaldır və hətta arıqlamaq istəyənlər üçün ideal qidadır.

Qan təzyiqini tənzimləyir

Badımcanın tərkibində kalium, maqnezium və fol turşusu kimi maddələr var ki, onlar qan dövranını yaxşılaşdırır, damar divarlarını möhkəmləndirir. Bu da yüksək təzyiqdən əziyyət çəkənlər üçün olduqca faydalıdır.

Qan şəkərini balansda saxlayır

Badımcan aşağı qlisemik indeksə malik olduğu üçün şəkərli diabet xəstələrinin də rasionuna əlavə edilə bilər. Liflə zəngin olması qanda şəkərin kəskin qalxmasının qarşısını alır və uzunmüddətli toxluq hissi yaradır.

Qaraciyər və böyrəklər üçün təbii təmizləyici

Tərkibindəki antioksidantlar və bitki mənşəli turşular sayəsində badımcan qaraciyərin fəaliyyətini stimullaşdırır, öd axımını yaxşılaşdırır və böyrəklərdə duz toplanmasının qarşısını alır.

Arıqlamaq istəyənlər üçün ideal seçim

100 qram bişmiş badımcan cəmi 24 kaloridir! Yəni həm mədə doluluğu verir, həm də çəki artımına səbəb olmur. Dietoloqlar onu qızartmadan, sobada və ya buğda bişirməyi tövsiyə edir.

Dərinin və saçın dostu

Badımcanda bol miqdarda E vitamini və polifenollar var. Bu maddələr dərinin qocalmasının qarşısını alır, saç köklərini möhkəmləndirir və orqanizmdə sərbəst radikallarla mübarizə aparır.

Bununla belə, badımcanın həddindən artıq istehlakı bəzi insanlarda mədə turşuluğunu artıra və allergik reaksiyalara səbəb ola bilər. Xüsusilə revmatoid artrit və ya böyrək daşından əziyyət çəkənlərə miqdarına nəzarət etmək tövsiyə olunur.

Badımcanı düzgün bişirdiyiniz halda o, təkcə yeməyin dadını deyil, sağlamlığınızı da zənginləşdirir. Qızartma yağında deyil, sobada və ya buğda bişirilmiş badımcan həm yüngül, həm də bədənə faydalı qidadır. (yenisabah)