Prezident İlham Əliyev Qarabağla bağlı əsas tələbi irəli sürdü: Ermənistanın silahlı qüvvələri çıxmalı, bölgədəki erməni hərbi və yarımhərbi elementləri tərk-silah edilməlidi;

Prezidentin Qoşulmama Hərəkatının Əlaqələndirmə Bürosunun görüşündə çıxışı zamanı dilə gətirdiyi bu fikirlər bir neçə kontekstdə diqqət çəkir.

Birincisi, Bakı erməni qoşunları ilə yanaşı, separatçıların qondarma “müdafiə ordusu” dedikləri dəstələrin də təslim olması mövqeyini qoyur: bu tələb həmişə mövcud olub, lakin indiyə qədər daha çox erməni qoşunların çıxarılmasından danışılırdı, İrəvan isə erməni hərbçilərini qondarma “müdafiə ordusu” adı altında komuflyaj edərək, bölgədə saxlamağa çalışır;

İkincisi, erməni qoşunların çıxarılması ilə yanaşı, terrorçu dəstələrin tərki-silah edilməsi Bakının Xankəndidə mərkəzi hakimiyyəti bərpa etməsi planının əsas elementlərindəndir və Prezident İlham Əliyev bu tələbi artıq beynəlxalq müstəvidə gündəmə gətirir;

Üçüncüsü, bu tələblərin Qoşulmama Hərəkatının görüşündə gündəmə gətirilməsi Bakının beynəlxalq ictimaiyyəti məlumatlandırması xarakteri daşıyır;

Ermənistanın qoşunlarını çıxarmaq öhdəliyini xoşluqla icra edəcəyi, atəş açılmadan bölgənin silahsızlaşdırılacağı gözləntisi azdır. Xankəndidəki separatçıların son açıqlamaları da göstərir ki, onlar təslim olmaq yox, müharibə aparmaq istəyirlər. Bu kontekstdə hər iki tələbin – erməni silahlı qüvvələrinin çıxarılması və separatçıların tərki-silah edilməsi icrasının Azərbaycan ordusu tərəfindən praktiki müstəvidə həyata keçiriləcəyi qaçılmaz görünür. Prezident İlham Əliyevin bunu beynəlxalq tədbirdə dilə gətirməsi də atılacaq addımlardan öncə beynəlxalq ictimaiyyəti məlumatlandırmaq məqsədi daşıyır.

Asif Nərimanlı