Ümumdünya səhiyyə statistikasına görə cütlüklərin təxminən 15%-i uşaq dünyaya gətirə bilmirlər. Bunun səbəbi qadın və kişi sonsuzluğu ola bilər, lakin 50%-dən çox halda sonsuzluğa səbəb qadın orqanizmindəki problemlər olur. Qadın sonsuzluğunun aşağıdakı səbəbləri var.
1.Qadın orqanizmində hormonal balansın pozulması.
Hormonal pozğunluqların əlamətlərinə əsasən menstrual tsiklin pozulması aiddir ki, bu zaman yumurtalıqlar öz funksiyalarını tam həcmdə yerinə yetirə bilmir və yumurta hüceyrəsinin yetişməsində problemlər olur. Bu cür pozuntular olduqda, hamilə qalma ehtimalı az olur və ya tamamilə olmur. Çox vaxt hormonal pozğunluqlar; polikistoz və yumurtalığın kistaları səbəbindən, habelə sinir və hormonal sistemi ilə bağlı bir sıra digər neyroendokrin pozğunluqlar nəticəsində meydana gəlir.
2. Uşaqlıq borularında patoloji dəyişikliklər qadın sonsuzluğun səbəblərinin təxminən yarısını təşkil edir.
Uşaqlıq borularının keçməməzliyinin anadangəlmə inkişaf qüsurları və keçirilmiş xəstəliklər ola bilər. Qadın orqanlarının yoluxucu xəstəlikləri bitişmə proseslərinin yaranmasına səbəb ola bilir və bu zaman mayalanma baş verə bilmir.
3. Qadın cinsi orqanlarının iltihab xəstəlikləri.
Uşaqlığın, uşaqlıq borularının iltihabı süzənək, üşaqlıq vərəmi və müxtəlif cinsi infeksiyalar səbəbindən yarana bilir.
4. Zədə və abortların nəticələri.
Bəzən qadınlar doğuş fəaliyyəti və ya abort zamanı zədələr alır ki, bu fonda ikincili qadın sonsuzluğu yaranır.
5. Qadın orqanlarında yeni törəmələr və şişlər qadın sonsuzluğunun uşaqlıq amili olaraq; mioma, fibromioma, polip kimi müxtəlif növ törəmələr buna səbəb olur. 6. Endokrin xəstəliklər qadın sonsuzluğunun geniş yayılmış səbəblərindən biridir.
Böyrəküstü, qalxanvari, mədəaltı vəzlərin funksiyası pozulduqda, orqanizmin ümumi və lokal hormonal fonunda pozulmalar ola bilir ki, bu da ovulyasiyanı mümkünsüz edir.
7. Maddələr mübadiləsinin pozulması.
Piylənmə təkcə estetik problem olmayıb, həm də bütövlükdə orqanizmin, o cümlədən qadın cinsi orqanlarının da ciddi patologiyasıdır.
8. Cinsi orqanların anadangəlmə qüsurları.
Bunlar irsi amillərdən, genetik pozğunluqlar, ekoloji çirklənmələrdən və radiasiyanın təsirlərindən irəli gələr. Uşaqlığının, yumurtalıqlarının və uşaqlıq borularının inkişaf anomaliyalarının olması praktiki olaraq qadın sonsuzluğunun səbəbidir.
9. Xroniki yorğunluq, stresslər.
Gərgin ritmli və yüksək emosional yüklü müasir həyat qadın orqanizminə neqativ təsir göstərir. Həddindən artıq yorğunluq, kifayət qədər yuxu almamaq, gərginliyi azaltmaq imkanının olmaması sonsuzluğa və bir sıra müxtəlif xəstəliklərə gətirib çıxarır.
10. Qadın sonsuzluğunun immunoloji amili.
Bu, qadın və kişi genlərinin immun uyğunsuzluğudur. Belə ki, qadın immun sistemi kişi hüceyrələrini aqressiv amil kimi qəbul edir və antigenlər hasil edərək onların mayalanma zonasına daxil olmasına imkan vermir.

“Ailə həkimi klinikası” F. Rüstəmova