Rusiya Prezidenti Vladimir Putin xaricdə yaşayan və ölkənin maraqlarına qarşı çıxaraq inzibati hüquqpozma törədən vətəndaşların əmlakının, o cümlədən bank hesablarındakı vəsaitlərin müsadirə olunmasını nəzərdə tutan qanunu imzalayıb.

Globalinfo.az xəbər verir ki, müvafiq sənəd rəsmi hüquqi informasiya portalında dərc olunub.

Qanuna əsasən, belə hüquqpozmalara “Rusiya Silahlı Qüvvələrinin diskreditasiyası”, Rusiyaya qarşı sanksiyalara çağırışlar, “nasist simvollarının təbliği”, eləcə də ekstremist materialların istehsalı və yayılması daxildir.

Həmçinin bu kateqoriyaya aid işlər üzrə cərimələrin ödənilməməsinə görə də məsuliyyət nəzərdə tutulur.

Yeni qanun inzibati məsuliyyətə cəlb edilən şəxslərin əmlakının, o cümlədən bank hesablarındakı vəsaitlərin həbsinə imkan yaradır. Bu zaman müsadirə olunan aktivlərin dəyəri tətbiq edilən cərimənin məbləğini də aşa bilər.

Bundan başqa, əgər vətəndaş ölkə xaricindədirsə və prosesual hərəkətlər barədə ona məlumat vermək mümkün deyilsə, məhkəmə ona müdafiəçi təyin etməlidir. İş üzrə icraat dayandırılarsa, müdafiəçinin xərcləri dövlət büdcəsi hesabına ödənilir.

Qanun 2026-cı il sentyabrın 1-dən qüvvəyə minəcək.