Son günlər ölkəmizin müxtəlif bölgələrində havaların qeyri-sabit keçməsi, güclü yağış, dolu yağması, sel-subasma hadisələri, fırtına-qasırğa kimi hallar müşahidə edilir. Bu hadisələr kənd təsərrüfatı və əkin sahələrinə də zərər vurub. Bununla əlaqədar olaraq sığortalı fermerlər tərəfindən Aqrar Sığorta Fonduna zərər müraciətlərinin sayı kəskin artıb.

Bu barədə Axar.az-a Aqrar Sığorta Fondunun nümayəndəsi Əli Əhmədov bildirib.

O deyib ki, güclü yağışların başladığı may ayı ərzində Aqrar Sığorta Fonduna ölkənin 24 rayonundan 3300-dən artıq müqavilə üzrə zərər müraciətləri daxil olub (01 iyun 2026-cı ilə olan vəziyyət):

“Zərər müraciətləri Zərdab, Şabran, Xızı, Ağcabədi, Şəki, Beyləqan, İsmayıllı, Hacıqabul, Yevlax, Tərtər, Xaçmaz, Qobustan, Goranboy, Oğuz, Xocavənd, Yardımlı, Zaqatala, Qax, Ağdam, Ağsu, Biləsuvar, Füzuli, Şahbuz və Qazax rayonlarını əhatə edir. Aqrar Sığorta Fonduna daxil olan müraciətlər 42 min hektar əkin sahəsini əhatə edir ki, bunun da 41 min hektarı taxıl sahələridir. Müraciətlər pambıq, gilas, alma, şaftalı, nektarin, badam, qoz və fındıq bağları üzrə də qeydə alınıb. Ən çox müraciət Şəki-Zaqatala, Qarabağ, Şirvan-Salyan, Dağlıq Şirvan və Qazax-Tovuz bölgələrindən daxil olub”.

Əli Əhmədov vurğulayıb ki, əsas zərər səbəbləri isə sel-subasma, çay daşqınları, fırtına, qasırğa, dolu və üçüncü şəxslərin hərəkətləridir:

“Son həftədə müraciətlərin böyük hissəsi dolu və fırtına-qasırğa hadisələri ilə bağlı olub. Fond bütün müraciətləri qeydiyyata alır, hadisələrin araşdırılması və zərərin qiymətləndirilməsi üçün bölgələrə aqrar sığorta ekspertləri göndərilir. Hazırda ekspertlər təsərrüfatlara və əkin sahələrinə dəyən zərərlərin qiymətləndirilməsini həyata keçirirlər. Zərərin həcmi və hadisənin xarakterindən asılı olaraq fermerlərə sığorta ödənişi veriləcək. Müraciət daxil olduqdan sonra 5-7 gün ərzində əraziyə aqrar sığorta eksperti göndərilir. Ekspert hadisənin baş verib-vermədiyini, səbəbini və zərərin ilkin həcmini müəyyənləşdirir. Əkinin tam məhv olduğu təsdiqlənərsə, ödəniş prosesinə başlanılır. Qismən zərər halında isə məhsul yığımına 5 gün qalmış ekspert sahəyə yenidən baxış keçirir, yekun zərəri qiymətləndirir və buna uyğun sığorta ödənişi həyata keçirilir. Aqrar sığorta əkin sahələrini dolu, sel, fırtına, leysan, qar, torpaq sürüşməsi, yanğın, vəhşi heyvanların hücumu və digər risklərdən qoruyur. Fermerlərə dəstək məqsədilə sığorta haqqının 50 faizi dövlət tərəfindən ödənilir. 1000 manat məhsul gözlənilən 1 hektar buğda və ya arpa sahəsinin sığortalanması ölkənin əksər bölgələrində 6,65-10,8 manat arasında dəyişir”.