“Bir dövlət başçısının ən böyük sirri rəqəmsal məlumatları deyil, əslində bioloji bilgiləridir”.

Globalinfo.az xəbər verir ki, bu barədə “Sözcü TV”nin baş direktoru Güney Öztürk paylaşım edib.

O, liderlərin DNT xəritəsini, genetik zəifliklərini və ya gizli xəstəliklərini öyrənmə yollarından danışıb:

“Bunun üçün həmin şəxsin sidik və nəcisindən istifadə olunur. Xarici kəşfiyyat xidmətləri bu məlumatları ələ keçirdiyi təqdirdə liderlərə qarşı şantaj və ya sui-qəsd strategiyası hazırlana bilər”.

Güney Öztürkün sözlərinə görə, məhz qeyd edilən səbəblərə görə ABŞ Prezidenti Donald Trampın Çinə səfəri zaman qaldığı oteldə gizli aparat yerləşdirilib:

“Bununla da, onun sidik və nəcisi otelin kanalizasiya sisteminə axıdılmadan əvvəl bu özəl sistemdə toplanıb. Məxfi xidmət agentləri bu qalıqları qablaşdıraraq, Prezidentin “Air Force” təyyarəsinin karqo bölməsinə yükləyiblər. Onlar bu üsulla Çin kəşfiyyatının bilgi əldə etməsinin qarşısını alıblar.

Texnologiya, diplomatiya və kəşfiyyatın kəsişdiyi nöqtədə dövlətlərin mühafizə protokollarının çatdığı ağlasığmaz səviyyə məhz budur”.

Qeyd edək ki, Fələstin Azadlıq Təşkilatının (FKÖ) uzun illər lideri və Fələstin siyasi hərəkatının əsas simalarından biri olan Yaser Ərafatla bağlı da oxşar iddialar var idi.

Belə ki, Ərafatın Fransada müalicə olunduğu dövrdə onun səhhəti ciddi şəkildə gizli saxlanılırdı və bu səbəbdən müxtəlif kəşfiyyat və sui-qəsd iddiaları ortaya çıxmışdı. Bəzi versiyalara görə, onun tibbi vəziyyəti (xərçəng və ya zəhərlənmə ehtimalı) xarici kəşfiyyat tərəfindən öyrənilib. Lakin bu iddiaları təsdiqləyən rəsmi və etibarlı sübut yoxdur.

Xatırladaq ki, Y.Ərafat 1969–2004-cü illərdə FKÖ-nün sədri kimi fəaliyyət göstərib və Fələstin məsələsinin beynəlxalq arenada tanınmasında əsas rol oynayıb.

1990-cı illərdə İsraillə aparılan Oslo sülh prosesində iştirak edib və bu prosesə görə Nobel Sülh Mükafatı alıb. 2004-cü ildə Fransada vəfat edib.