İran ABŞ ilə müharibənin hələ bitmədiyini hesab edir.

Publika.az xəbər verir ki, bu barədə İran ordusunun nümayəndəsi Məhəmməd Əkrəminiya milli televiziyanın efirində bəyanat verib.

O, mövcud şəraiti hələ də hərbi vəziyyət kimi dəyərləndirdiklərini bildirib. Əkrəminiya İran vətəndaşlarını əmin edib ki, ABŞ yenidən təcavüzə əl atarsa, Tehranın yeni yanaşması və cavabı ilə üzləşəcək.

Ordu rəsmisi qeyd edib ki, hazırkı atəşkəs dövründə Tehran münaqişənin bərpa olunacağı təqdirdə zərbə endiriləcək hədəflərin siyahısını yeniləyib, həmçinin silahların istehsalı və modernləşdirilməsi istiqamətində addımlar atıb.

Aprelin 22-də Ağ Ev nümayəndəsi ABŞ və İran arasında atəşkəsin uzadıldığını bildirib. "The Wall Street Journal" qəzetinin məlumatına görə, İran tərəfi ABŞ-a çoxmərhələli danışıqlar təklif edib. Qeyd olunub ki, birinci mərhələ hərbi əməliyyatların dayandırılmasına, habelə İslam Respublikasına və Livana hücum etməmək barədə öhdəliklərin təsbit olunmasına yönəlib. İkinci mərhələ Hörmüz boğazında gəmiçilik rejiminin razılaşdırılmasını nəzərdə tutur. Yekun olan üçüncü mərhələ isə İranın nüvə proqramının müzakirəsinə həsr olunacaq.

Nəşrin yazdığına görə, Ağ Ev İranın təşəbbüsünü etibarsızlıqla qarşılasa da, hələlik təklifi rədd etməyib.