İranla ABŞ arasında iki həftəlik atəşkəs elan edilməsi və Pakistanın paytaxtı İslamabadda baş tutan danışıqların hər hansı bir nəticə vermədən başa çatması istər-istəməz bundan sonra prosesin hansı istiqamətdə cərəyan edəcəyilə bağlı suallar doğurmağa başlayıb.
Bir çox ekspertlər bu müstəvidə hesab edir ki, prosesdə nəticənin olmaması vəziyyətin yenidən gərginləşməsinə rəvac verə bilər. ABŞ İran limanlarına daxil olan və oradan çıxan bütün gəmilərə qarşı dəniz blokadasına başlayacağını bəyan edib. Bunun özü də nəticəsiz yekunlaşan danışıqlar fonunda gərginliyi daha da artırır.
Milli Məclisin deputatı Arzuxan Əlizadə Bakupost.az-a bildirib ki, birinci raunddakı nəbz yoxlamasının ardınca, danışıqların ikinci raundunun baş tutması ehtimalı böyükdür:
“İslamabadda tərəflər arasında keçirilən danışıqların nəticəsiz başa çatmasının atəşkəs məsələsinə hər hansı bir təsiri olmayacaq. Tərəflər aprelin 21-nə qədər olan atəşkəs dövrünə düşünürəm ki, əməl edəcəklər. Eyni zamanda, hər iki tərəf danışıqların ikinci raundunun baş tuta biləcəyilə bağlı mövqe də sərgiləyib”.
Deputat düşünür ki, növbəti raundda prosesə Avropa İttifaqı (Aİ) da qoşula bilər:
“Hətta Avropa İttifaqının da prosesə qoşulması ehtimalı var. Belədə, razılaşdırılarsa, növbəti danışıq Avropa ölkələrinin birində də baş tuta bilər. İstənilən halda tərəflər arasında bir dialoq mövcuddur. Baxmayaraq ki, razılıq əldə olunmayıb”.
Onun sözlərinə görə, danışıqların ikinci raundunda müəyyən nəticələr əldə olunacaq:
“Hesab edirəm ki, ikinci raundda müəyyən nəticələr əldə olunacaq. Hətta burada daha uzunmüddətli atəşkəsin elan ediləcəyini də ehtimal etmək olar. Çünki danışıqların nəticəsiz bitməsinə baxmayaraq hər iki tərəfdən qarşı tərəflə bağlı müsbət fikirlər səsləndirilir”.
A.Əlizadənin fikrincə, xüsusən Hörmüz boğazı ətrafında yaranmış vəziyyəti tərəfləri yenidən bir masa arxasında əyləşməyə məcbur edəcək:
“Neftin qiyməti 100 dolların üzərindədir ki, bu da ABŞ-nin özü üçün də müəyyən narahatlıq yaradır. Digər tərəfdən, Trampın Konqresin razılığını almadan 60 günlük müharibə aparmaq səlahiyyəti də bitmək üzrədir. Xüsusən də, Hörmüz boğazı ilə bağlı yaranmış gərgin vəziyyət tərəfləri yenidən danışıqlar masası arxasına oturmağa vadar edəcək. Nəticə etibarı ilə tərəflər hansısa razılığa da gələcəklər”.
Deputat qeyd edir ki, ikinci raund danışıqlar da nəticə verməsə, bu halda hərbi eskalasiyanın yenidən alovlanacağını gözləmək olar:
“Nəzərə alaq ki, İsrail də bunda maraqlıdır”.