ABŞ və İsrail son hücumlar zamanı İranın atom obyektlərinə dəymiş ziyanı ödəməlidir.

Publika.az xəbər verir ki, bu barədə İslam Respublikasının xarici işlər naziri Abbas Əraqçi BMT-nin Baş katibi Antoniu Quterreşə ünvanladığı məktubda bildirib.

"İranın Nətənzdəki dinc nüvə obyektlərinə və Buşəhr elektrik stansiyası yaxınlığına edilən hücumlar BMT Nizamnaməsinin, Beynəlxalq Atom Enerjisi Agentliyinin Nizamnaməsinin və beynəlxalq hüquq normalarının pozulmasıdır", - deyə nazir vurğulayıb.

Onun sözlərinə görə, nüvə obyektlərinə endirilən zərbələr radioaktiv materialların genişmiqyaslı sızmasına, insanlar və ətraf mühit üçün son dərəcə təhlükəli nəticələrə səbəb ola bilər.

Əraqçi qeyd edib ki, İranın atom obyektlərinin Amerika-İsrail tərəfindən bombalanması "təcavüz aktıdır". İslam Respublikasının XİN rəhbəri hücumların dərhal dayandırılmasına, "İsrail və ABŞ-ın dəymiş ziyana görə tam təzminat ödəməsinə" çağırıb.