ABŞ-ın yeni Milli Təhlükəsizlik Strategiyası Avropa ilə əlaqələrdə ciddi dönüş nöqtəsi kimi qiymətləndirilir. Sənəd göstərir ki, Vaşinqton artıq Avropa İttifaqı (Aİ) ilə vahid blok olaraq deyil, ayrı-ayrı üzv ölkələrlə ikitərəfli əməkdaşlığa üstünlük verir. Xüsusilə İtaliya, Macarıstan, Avstriya və Çexiya bu yanaşmada xüsusi yer tutur.

Ağ Ev rəsmi olaraq bu iddiaları təkzib etsə də, Avropa mətbuatı ABŞ rəhbərliyinin adı çəkilən ölkələrin Aİ-dən çıxmasını istəyə biləcəyini yazır. Bu yanaşma, Avropa inteqrasiyasına dair transatlantik münasibətlərdə yeni geosiyasi dinamikanın işarəsi kimi dəyərləndirilir.

Globalinfo.az-a danışan siyasi şərhçi Cavanşir Abbaslı deyib ki, Vaşinqton heç vaxt belə bir addımı atmaz:

“Çünki Avropa ölkələrinin bir arada olduğu qurum dağılarsa, bunun hansı fəsadlara yol aça biləcəyini nəzərə almaq lazımdır. İlk növbədə, Rusiyanın əl-qolu daha da genişlənəcək, Kreml ardıcıl olaraq İttifaqda yer alan ölkələrə qarmaq atacaq. İttifaqda elə dövlətlər var ki, Rusiya ilə yaxın əməkdaşlıqda maraqlıdırlar. Sadəcə birlik buna imkan vermir. O baxımdan, ABŞ Aİ-nin dağılmasına imkan verməz. Məsələn, Avropa İttifaqının üzvlərindən Macarıstan Rusiya ilə kifayət qədər yaxın əlaqələrə malikdir. Ukrayna savaşı başlayandan bu günə qədər rəsmi Budapeştin sərgilədiyi mövqe daim kollektiv Qərb tərəfindən ciddi narazılıqla qarşılanıb. Ümumiyyətlə, adları çəkilən dörd ölkə ittifaqdan çıxsa belə, bu, birliyin dağılması anlamına gəlmir.

Bütün bunları nəzərə alaraq ABŞ-ın Avropa İttifaqı və NATO-nun dağılmasında maraqlı olduğunu düşünmürəm.Vaşinqton onsuz da bu qurumlarda əsas söz sahibidir. Sözügedən iddialar sadəcə Prezident Donald Tramp ikinci dəfə hakimiyyətə qayıtdıqdan sonra dünyanın əsas supergücünün dəyişkən xarici siyasəti ilə bağlıdır. Amma bütün hallarda Tramp bəzən hər kəsin təəccübünə səbəb olan xarici siyasət aparsa da, Avropa İttifaqını dağıdacaq qədər irəli getməz. İttifaqda İtalya və kifayət qədər güclü digər ölkələr yer alır. Ən azından onlar sona qədər burada dirəniş göstərərlər”.