Ermənistanın Baş naziri Nikol Paşinyan Sankt-Peterburqda keçirilən Ali Avrasiya İqtisadi Şurasının iclasında Azərbaycan vasitəsilə Ermənistana tranzit yüklərin daşınması və ikitərəfli ticarətin başlanması üçün şərait yaradılması qərarına görə Prezident İlham Əliyevə minnətdarlığını bildirib.

Paşinyan regional iqtisadi inteqrasiyanı gücləndirmək üçün Ali Avrasiya İqtisadi Şurasının üzv dövlətləri və müşahidəçilərlə konstruktiv dialoqun vacibliyini vurğulayıb. O, daxili bazarın rahat işləməsi, maneələrin aradan qaldırılması, rəqəmsallaşdırma və tənzimləmə prosedurlarının sadələşdirilməsinin Ermənistan üçün prioritet olduğunu bildirib.

Baş nazir bərabərlik, suverenlik və milli yurisdiksiyaya əsaslanan ticarət və logistika əməkdaşlığının inkişafına xüsusi diqqət yetirib və bu qərarı regionda sülh və sabitliyin bərqərar olmasında ilk böyük nailiyyətlərdən biri kimi qiymətləndirib.

Globalinfo.az-a danışan siyasi şərhçi Füzuli Qurbanov deyib ki, 1920-ci ildə Ermənistan SSR yaradıldıqdan bu günə qədər ilk dəfədir bir erməni lider bu kontekstdə Azərbaycan dövlət başçısına təşəkkür edir:

“Prezident İlham Əliyev hərb meydanında qalib gəldiyi dövlətin başçısına sülh və əməkdaşlıq əlini uzadıb. Bu, İkinci Qarabağ müharibəsindən sonra baş verib, lakin ilk dəfədir bu addıma Ermənistan tərəfdən açıq cavab gəlir. İrəvan rəsmi olaraq MDB kürsüsündən belə bir addım atıb.

Paşinyan bu addımı ilə faktiki olaraq Azərbaycanın sülhsevər mövqeyini və regionda kommunikasiyaların açılması ilə bağlı konstruktiv yanaşma sərgilədiyini etiraf edir. Yəni göründüyü kimi bir tərəfdən ölkə başçısının regional və qlobal miqyasda nüfuzunun səviyyəsi ortaya qoyulur, digər tərəfdən isə bu nüfuz etiraf edilir. Ermənistan həm də İran, Rusiya və Qərbə mesaj verir ki, Azərbaycanla sülhə hazırdır. Bunun üçün isə 5 baza prinsipi qəbul edilməlidir. Məhz ona görə Paşinyanın təşəkkür etməsi Ermənistan–Azərbaycan münasibətlərində beynəlxalq miqyasda ciddi dəyişikliklərin baş verdiyini göstərir”.