Ölkədə avtobuslardan istifadə edən sərnişinlərin sayı artıb. Belə ki, 2025-ci ilin yanvar-iyun aylarında avtobuslarla 861 milyondan çox sərnişin daşınıb. Bu da 2024-cü ilin eyni dövrü ilə müqayisədə 52 milyon 554 min nəfər çoxdur.

2025-ci ilin ilk 5 ayı ərzində şəxsi avtomobil və taksilərlə həyata keçirilən gedişlərin sayı 41,8%-ə qədər azalıb. Bu müddət ərzində ictimai nəqliyyatın payı 33,9%-ə qədər artıb.

Bu nəticənin son illərdə ölkədə ictimai nəqliyyatın modernləşdirilməsində görülən işlərlə əlaqədar olduğu bildirilir. Avtobus parklarının yenilənməsi, avtobus zolaqlarının çəkilməsi, elektrikli avtobusların ölkəmizə gətirilməsinin bunda rol oynadığı deyilir.

Ümumilikdə son illərdə ictimai nəqliyyatda hansı işlər görüldü? Və taksi, şəxsi avtomobillərdən ictimai nəqliyyata keçidin geniş vüsət alması paytaxtımızdakı həyata necə təsir edə bilər?

Globalinfo.az-a danışan Milli Məclisin deputatı Vüqar Bayramov bildirib ki, ictimai nəqliyyatdan istifadə tıxacın və sıxlığın aradan qaldırılmasında vacib vasitələrdən biridir:

“Son dövrlərdə ictimai nəqliyyatdan daha çox istifadə olunduğunu görürük. Bunun bir neçə səbəbi var. Məsələn, xüsusi avtobus zolaqlarının açılması insanlarda maraq yaradır, çünki bu zolaqlar avtobusların tıxaca düşməsinin qarşısını alır.

Nəticədə bir çox hallarda vətəndaşlar gedəcəkləri ünvanlara fərdi maşın və ya taksilər əvəzinə avtobuslarla daha tez çatmağa üstünlük verirlər. Avtobus parkının yenilənməsi də istifadəyə marağı artıran digər amillərdəndir. Yeni avtobusların alınması mühüm addımdır. Beynəlxalq praktikada da buna bənzər nümunələrə rast gəlinir. İnsanların ünvanlarına daha tez çatması, tıxac və sıxlığın azalması üçün əsas amil məhz budur”.

Milli Məclisin deputatı Müşfiq Cəfərov isə məsələyə belə münasibət bildirib:

“Bakıda son illər ictimai nəqliyyat sahəsində müşahidə edilən müsbət dəyişikliklər təsadüfi deyil. Əgər bir vaxtlar ictimai nəqliyyat tıxacda saatlarla ilişib qalmaq, sərnişinlərin isə əsəbi və yorğun halda dayanacaqlarda gözləməsi ilə müşahidə olunurdusa, indi mənzərə yavaş-yavaş dəyişir. İnfrastruktur layihələri, avtobus parkının yenilənməsi və ekoloji baxımdan daha təmiz nəqliyyat vasitələrinin gətirilməsi paytaxtda ictimai nəqliyyat anlayışını yenidən formalaşdırır.

Maraqlısı odur ki, artıq insanlar şəxsi avtomobildən avtobusa keçid edir. 2023-cü ildə gedişlərin təxminən yarısı şəxsi maşın və taksi ilə olurdusa, bu il göstərici azalıb. Paralel olaraq ictimai nəqliyyatın payı 28,4 faizdən 33,9 faizə yüksəlib. İşə gecikməmək və tıxacda vaxt itirməmək artıq avtobusun üstünlüyünə çevrilir. Bütün bu faktlar ictimai nəqliyyatın avtobus seqmentindəki cəlbediciliyini artırır.

Bakıda avtobus parkının yenilənməsi də ictimai rəyin dəyişməsində mühüm rol oynayır. Keçən il COP29 ərəfəsində gətirilən 160 elektrikli avtobus artıq şəhər sakinlərinin xidmətindədir. Onlara əlavə olaraq 2025-ci ildə 50 yeni avtobus xəttə buraxılacaq, ilin sonuna qədər isə 200-dən çox ekoloji təmiz və komfortlu avtobusun gətirilməsi gözlənilir.

Düşünürəm ki, dövlətimizin nəqliyyat sahəsindəki siyasəti avtobusu yalnız ucuz və əlçatan nəqliyyat vasitəsi yox, həm də vaxta qənaət edən, ekoloji və sosial baxımdan üstün bir seçim olmasına gətirib çıxaracaq”.