Prezident İlham Əliyev III Şuşa Qlobal Media Forumunda AZAL təyyarəsinin qəzaya uğraması ilə bağlı mühüm detallar açıqlayıb. Ölkə başçısı hadisədən 7 ay keçməsinə baxmayaraq, hələ də Rusiya rəsmilərindən heç bir cavab ala bilmədiklərini bildirib. Prezident vurğulayıb ki, hadisənin təfərrüatları artıq bəllidir və Moskva bunu etiraf etməlidir.

Sitat: “Təyyarəni vuranlar cəzalandırılmalı, qurbanların ailələrinə təzminat ödənilməlidir. AZAL-ın özünə də təzminat ödənilməlidir. Daha çox təfərrüat eşitmək istəyirsinizmi? Danışa bilərəm. Bizim pilotlat cəsarət və peşəkarlıq göstərdilər. Təyyarəni qəza enişi etdi. Pilotların sayəsində sağ qalanlar oldu. Təyyarə kənardan vurulmuşdu.Təyyarənin Ukrayna dronu ilə toqquşması məlumatı gülüş doğururdu. Bu, uşaq bağçası səviyyəsində olan nağıldır. İki dəfə təyyarəyə hücum edilmişdi. Biz bilirik nə baş verib. Rusiyanın hava məkanı bağlanmamışdı. Hava məkanı təyyarə vurulandan sonra bağlanmışdı”.

Prezidentin bu çıxışından sonra Rusiya tərəfi hansı addımlar atacaq? Moskva Bakının tələblərini yerinə yetirəcəkmi?

Globalinfo.az-a danışan politoloq Oqtay Qasımov deyib ki, Prezidentin dünənki çıxışı bir sıra məsələlərə, o cümlədən təyyarə qəzası və Rusiya–Azərbaycan münasibətlərinə ciddi şəkildə aydınlıq gətirdi:

“Ölkə rəhbəri bir daha bəyan etdi ki, Rusiya tərəfi üzərinə düşən öhdəlikləri yerinə yetirməyib və hələ də bunu etmək niyyətini göstərməyib. Buna görə də, Azərbaycan istintaqın süni şəkildə uzadılmasını və ölkəmizin tələblərinə cavab verilməməsini Moskva ilə münasibətlərimizin ruhuna uyğun olmayan bir davranış kimi qiymətləndirir. Eyni zamanda, Prezident vurğuladı ki, Azərbaycan bu məsələ ilə bağlı Rusiya tərəfindən məlumatlandırılıb və gələcəkdə beynəlxalq ədliyyə sisteminə müraciət etmək üçün sənədlərin hazırlanacağı nəzərdə tutulur. Bu, artıq ciddi bir məsələdir, çünki rəsmi Kreml Bakını bu addımı atmağa məcbur edib”.

Politoloq qeyd edib ki, Rusiyanın dövlət anlayışı və hazırda hakimiyyətdə olan şəxslərin düşüncəsi hər kəsə məlumdur:

“Bu səbəbdən, Kremlin təyyarə qəzası ilə bağlı hər hansı bir addım atacağını və Bakının tələblərini yerinə yetirəcəyini gözləmirəm. Şübhəsiz ki, bu cür hərəkətlər ikitərəfli münasibətlərə zərər verəcək. Rusiya dünənki çıxışdan və verilən mesajlardan yenə də nəticə çıxarmasa, Azərbaycan tərəfi Beynəlxalq Məhkəməyə müraciət edəcək. Bu isə Moskva-Bakı münasibətlərinə əlavə kölgə salacaq, bundan sonra münasibətlər daha da soyuqlaşacaq. Bütün bu proseslər birbaşa Rusiyanın məsuliyyətindədir və onların səhvləri nəticəsində baş verib”.