Ukrayna müharibəsi, İran-İsrail gərginliyi və qlobal münaqişələr müdafiə xərclərini artırıb. Bu artımın ən bariz nümunələrindən biri Avropada baş verir. İkinci Dünya Müharibəsindən sonra sərt sanksiyalara görə ordusunu inkişaf etdirməyən Almaniya hərəkətə keçir. Hökumət yüzlərlə tank və zirehli maşın istehsal etmək qərarına gəlib. Üstəlik, bu təşəbbüs Almaniya ilə məhdudlaşmır.

Publika.az xəbər verir ki, bu barədə Almaniyanın “Handelsblatt” qəzetində məlumat verilib.

Bildirilir ki, Almaniya Ukrayna müharibəsinin başlaması ilə Şərqi Avropada pik həddə çatan “təhlükəsizlik təhdidi” səbəbindən ordusuna illərdir qoymadığı böyük sərmayə yatırmağa hazırlaşır. Bu investisiyanın ən diqqət çəkən detallarından biri 1000-ə yaxın "Boxer" zirehli döyüş maşını və zirehli personal daşıyıcısı, 600-ə yaxın "Leopard 2A8" əsas döyüş tankı və çoxsaylı "Puma" zirehli döyüş maşınının alınmasıdır. Ekspertlər bu addımı "soyuq müharibə"dən bəri ən əhəmiyyətli silahlanma proqramlarından biri hesab edirlər.

Qeyd olunur ki, Rusiyanın 2022-ci ildə Ukraynanı işğal etmək məqsədi ilə başlatdığı müharibə Berlinin müdafiə siyasətini tamamilə dəyişdirib. Almaniyada qərar qəbul edənlər artıq Avropa daxilində münaqişəyə uzaq bir ehtimal kimi baxmırlar. Buna görə də hökumət təcili, davamlı və sərfəli həll yolları üçün mühüm qərarlar qəbul edir. Bu kontekstdə alman ordusunu gücləndirmək üçün atılan ən mühüm addım, əvvəlki hökumətin o zamankı kansleri Olaf Şoltsun 100 milyard avro dəyərində xüsusi müdafiə fondunun yaradılmasını açıqlaması ilə başlayıb.

Məlumata görə, Almaniya ordusu hazırda ümumilikdə 313 əsas döyüş tankına malikdir. Bu donanma 104 "Leopard 2A7V" tankı ilə birlikdə 209 "Leopard 2A5" və "2A6" tankından ibarətdir. Bundesverin 258 "Marder 1A3" və "A4" tankı, 72 "Marder 1A5" tankı və 350 "Puma"dan ibarət 680 maşından ibarət zirehli döyüş maşını var. Zirehli personal daşıyıcı sinfində 331 "Boxer" tankı və 359 müxtəlif variantlı "TPz-1" tankından ibarət 690 avtomobil parkının olması təxmin edilir.

Almaniyanın atacağı bu addımın ən mühüm detallarından biri "Leopard 2A8" tankları olacaq. Bu tanklar rəqəmsallaşdırılmış döyüş idarəçiliyinə malikdir. 600 "Leopard 2A8" tankının alınması Almaniyanın zirehli qüvvə qabiliyyətini "soyuq müharibə"dən bəri görünməmiş səviyyəyə artıra bilər. Müxtəlif missiyalarda istifadə üçün 1000 zirehli transportyor əldə etmək planı da Almaniya ordusunun müxtəlif ssenarilərə hazırlaşdığını nümayiş etdirir.