Milli Məclisə təqdim olunan yeni qanun layihəsinə görə, zəlzələ, yanğın, partlayış və ya müharibə kimi səbəblərlə evsiz qalan şəxslərə dövlət hesabına verilən yeni evlər daha asan şəkildə sənədləşdirilə biləcək. Artıq bu evlərin qeydiyyatı üçün uzun-uzadı sənədlərə ehtiyac olmayacaq – kimə hansı evin verildiyi və tikinti layihəsi göstərildikdən sonra proses başlaya biləcək.

Qeyd edək ki, əvvəlki dövrlərdə sənədlərdə uyğunsuzluq aşkar olunduqda müraciət sadəcə imtina ilə nəticələnirdi. Yəni sənədsiz evlərin qeydiyyatı üçün verilən müraciətlər qəbul olunmurdu. Yeni qaydalara əsasən, qarşı tərəf imtina əvəzinə məlumatın dəqiqləşdirilməsi tələb edə bilər.

Bu dəyişiklik sənədləşmə prosesini sürətləndirəcəkmi?

Globalinfo.az-a danışan əmlak məsələləri üzrə ekspert Elnur Fərzəliyev deyib ki, istənilən fövqəladə hal zamanı vətəndaşların mənzillərinə ciddi zərər dəydikdə və bu hal təbii fəlakət kimi qeydə alındıqda, dövlət dəymiş zərəri qarşılayır:

“Həmçinin vətəndaşlara yeni mənzillər verilir. Bu evlər isə dövlət hesabına tikildiyi üçün mütləq rəsmi qeydiyyata salınır və çıxarışlar təqdim olunur. Digər tərəfdən, hazırda ölkədə yüz minlərlə “kupça” ala bilməyən fərdi yaşayış evləri var. Bunların əksəriyyətinin ilkin sənədi olsa da – məsələn, bələdiyyə sərəncamı, rayon icra hakimiyyətinin qərarı və ya keçmiş kolxoz, sovxoz və digər qurumların sənədləri – torpağın təyinatının fərqli olması, qadağan olunmuş ərazidə yerləşməsi və ya tikinti normativlərinə uyğun gəlməməsi səbəbindən həmin evlərə çıxarış verilmir”.

Ekspert bildirib ki, sözügedən evlərlə bağlı da bir sıra dövlət layihələri hazırlanır:

“Bu, yaxın gələcəkdə belə evlərin də sənədləşməsi üçün lazımdır. Lakin “kupça”sız evlərin qeydiyyatı məsələsi ilə dövlətin vətəndaşlara verdiyi mənzillər siyasəti tamamilə ayrı mövzudur”.