“İsrail–İran münaqişəsi təhlükəlidir, amma bizə təsir etməyəcək”. Bunu Rusiya Təhlükəsizlik Şurasının sədr müavini Dmitri Medvedev deyib.

Onun sözlərinə görə, İsrail və İran arasında münaqişə qlobal xarakter daşıya biləcəyi üçün təhlükəlidir. Lakin buna baxmayaraq, Medvedev hesab edir ki, bu qarşıdurma Rusiyanın maraqlarına birbaşa təsir etmir.

“Nə qədər qəribə səslənsə də, İsrail və İran arasındakı bütün bu qarışıqlığın bizim işlərimizə heç bir zərəri yoxdur. Əksər amerikalılar ölmək üzrə olan Ukraynanın harada olduğunu belə bilmirlər və onlara yad olan münaqişəyə pul xərcləməyə qətiyyən həvəs göstərməyən Trampın komandası hazırda çox gərgindir”, – deyə o bildirib.

Globalinfo.az-a danışan politoloq Elxan Şahinoğlu qeyd edib ki, Rusiya rəsmiləri bir ağızdan “İsrail İrana hücumu dayandırmalıdır, danışıqlara üstünlük verilməlidir” deyirlər:

“Lakin bu çağırışlar Kremlin öz siyasəti ilə ziddiyyət təşkil edir. Təzad ondadır ki, Rusiya özü Ukrayna ilə danışıqların tərəfdarı deyil. Əksinə, son günlər Rusiya Ukraynanın müxtəlif şəhərlərinə raket və pilotsuz aparatlarla hücumların miqyasını artırıb. Halbuki Qərb ölkələri və beynəlxalq təşkilatlar Kremlə müharibəni dayandırıb danışıqlar masasına oturmağı təklif edirlər. Rusiya isə bu təklifləri ya rədd edir, ya da danışıqları müharibə ilə paralel aparmağa üstünlük verir. Başqa sözlə, Kreml özünə rəva görmədiyini başqasına rəva görür.

Əgər Rusiya vaxtında Ukrayna ilə problemi diplomatik yollarla həll etməyə çalışsaydı, bu gün İsrail–İran qarşıdurması da bu qədər kritik həddə çatmazdı. Rusiya Ukraynaya qarşı müharibəni “Rusiyanın maraqları təmin edilməlidir” tezisi altında aparır. Bu isə İsrailin arqumenti ilə üst-üstə düşür: “İranın nüvə silahı olmamalıdır”. Rusiya da Ukraynada rejimi dəyişmək niyyəti ilə hərəkət edir, eyni məqsəd İsrailin də İranla bağlı siyasətində müşahidə olunur. Burada açıq bir gerçəklik ortaya çıxır beynəlxalq hüquq işləmədiyi üçün hər kəs öz gücünə əsaslanaraq qərar verir. Bu da yeni qlobal nizamsızlıq erasının göstəricisidir.”