ABŞ prezidenti Donald Tramp İsrailin İrana qarşı hərbi əməliyyatına qoşulmağa qərar verərsə, İtaliya ABŞ-ı öz ərazisində hərbi bazalarla təmin edə bilər.

Publika.az xəbər verir ki, bu barədə “La Repubblica” qəzeti İtaliya hökumətindəki mənbələrə istinadən məlumat yayıb. Bildirilir ki, hələlik tərəfdaşlardan belə bir müraciət daxil olmayıb.

Qeyd olunur ki, Roma ehtiyatlı davranır, çünki İraq və Livanda yerləşdirilmiş İtaliya kontingenti var və ABŞ-ın İsrailə dəstək verəcəyi təqdirdə digər dövlətlərin bazalarının hədəfə alınacağı ilə bağlı xəbərdarlığı fonunda təhlükə altında ola bilər.

Bununla yanaşı, qəzet son qərarın Romanın olsa belə, İtaliya hökumətinin Vaşinqtondan imtina edə bilməyəcəyinə diqqət çəkir. Bu halda söhbət NATO-nun Aviano, Viçensa, Neapol və Siqonelladakı bazalarından (Siciliya adasında) gedir. Kanadada G7 sammitindən sonra keçirilən mətbuat konfransı zamanı İtaliyanın baş naziri Corca Meloni bazalardan mümkün istifadə ilə bağlı sualı cavablandırmaqdan yayınıb.

"Vəziyyəti vaxtı gələndə dəyərləndirəcəyik. Belə qərarlar dərhal qəbul edilmir", - deyə o bildirib.

Bildirilir ki, Roma ABŞ-ın ilk növbədə regional bazalarından - Səudiyyə Ərəbistanı, Misir və Bəhreyndəki bazalarından istifadə edəcəyinə ümid edir.