“Bu gün Şuşa Bəyannaməsinin imzalanmasının 4-cü ildönümüdür. Şuşa Bəyannaməsi 2021-ci ildə, məhz 15 iyun – Azərbaycanın Milli Qurtuluş Günündə Azərbaycan və Türkiyə prezidentləri tərəfindən imzalanıb. Bu sənəd iki dövlət arasında münasibətləri daha da rəsmiləşdirdi və tərəfdaşlıq səviyyəsindən müttəfiqlik səviyyəsinə yüksəltdi. Sənədin önəmi yalnız Azərbaycan və Türkiyə ilə məhdudlaşmadı, bir çox siyasi ekspertlər, analitiklər və beynəlxalq mərkəzlər tərəfindən də mühüm strateji sənəd kimi qəbul olundu və şərh edildi”.

Bu fikirləri Globalinfo.az-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev deyib.

Onun sözlərinə görə, əsas məqamlardan biri də müttəfiq dövlətlər olan Azərbaycan və Türkiyənin bu bəyannamə çərçivəsində iqtisadi, siyasi və hərbi sahələrdə daha ciddi və praktiki addımlar ata, mühüm razılaşmalar imzalaya bilməsidir:

“Sənədin məhz Şuşada imzalanması Türkiyənin Azərbaycanın ərazi bütövlüyünə verdiyi dəstəyi bir daha təsdiqlədi və bunun böyük rəmzi mənası oldu.

Ən çox verilən suallar isə təhlükəsizlik məsələləri ilə bağlıdır. Həm Azərbaycan, həm də Türkiyə bu bəyannamə əsasında birgə hərbi sənaye kompleksinin inkişafı, xüsusi xidmət və hüquq-mühafizə orqanlarının koordinasiyalı fəaliyyəti istiqamətində əməkdaşlığı gücləndirməkdədir. Artıq bu sənədə əsaslanaraq birgə hərbi təlimlər keçirilir, Azərbaycan Ordusunun Türkiyə modelinə keçməsi istiqamətində vacib addımlar atılır. Müdafiə sənayesinin inkişafı sahəsində də ciddi hazırlıqlar görülməkdədir.

Parlamentlər səviyyəsində də bu əməkdaşlıq genişlənməkdədir. Türkiyə Böyük Millət Məclisinin Müdafiə Komitəsi ilə Azərbaycan Milli Məclisinin Müdafiə, təhlükəsizlik və korrupsiya ilə mübarizə komitəsi arasında görüşlər keçirilib. Bu görüşlər gələcək əməkdaşlığın hüquqi və praktiki əsaslarını formalaşdırır.

Bəyannamə çərçivəsində regional əməkdaşlığa dair də mühüm addımlar atılır. Zəngəzur dəhlizi və regional nəqliyyat əlaqələri mövzusunda Türkiyənin diplomatik dəstəyi xüsusi rol oynayır. Eyni zamanda Azərbaycan da Şimali Kipr məsələsində Türkiyəyə və birbaşa Şimali Kipr Türk Cümhuriyyətinə açıq dəstək nümayiş etdirib.

Mədəni, hərbi və mənəvi sahələrdə ortaq fəaliyyət bu bəyannamədən sonra daha da geniş vüsət alıb. Gələcəkdə də müdafiə sənayesi sahəsində yeni silahların istehsalı və digər mühüm layihələrin həyata keçirilməsi gözlənilir.

Azərbaycan və Türkiyə bu gün Türk Dövlətləri Təşkilatında da ortaq güc mərkəzi kimi çıxış edirlər. Yaxın günlərdə bu təşkilata üzv olan dövlətlərin birgə mülki müdafiə sisteminin yaradılması ilə bağlı addımlar atılıb. Bu təşəbbüslər Şuşa Bəyannaməsinin real nəticələri kimi dəyərləndirilməlidir.

Nəticə etibarilə, Şuşa Bəyannaməsi sadəcə bir sənəd deyil, bu, strateji müttəfiqliyin təməl daşıdır və nümunə olaraq digər dövlətlərlə də bənzər əlaqələrin qurulması üçün yeni perspektivlər açır”.