“Zəngəzur Mis-Molibden Kombinatının satış göstəriciləri əvvəlki illərlə müqayisədə azalıb. Bu səbəbdən 2025-ci ildə dövlətə ödəniləcək məbləğin aşağı düşəcəyi gözlənilir”.

Globalinfo.az xəbər verir ki, bu fikirləri Ermənistan Dövlət Gəlirləri Komitəsinin sədri Eduard Akopyan deyib.

Akopyan kombinatın 1000 ən böyük vergi ödəyicisi siyahısından çıxması ilə bağlı suala cavabında deyib ki, bu hal texniki və müvəqqəti xarakter daşıyır:

“Şirkət 2024-cü ildə dövlət büdcəsinə böyük həcmdə vergi ödəyib, lakin sonradan həmin məbləğin təxminən 22-23 milyard dramı geri qaytarılıb. Bu birdəfəlik əməliyyat nəticəsində kombinat müvəqqəti olaraq iri vergi ödəyiciləri siyahısından çıxarılıb. Bu vəziyyət kombinatın yaxın rüblərdə həmin siyahıya geri dönməsinə əngəl yaratmır”.

Qeyd edək ki, Zəngəzur Mis-Molibden Kombinatı Oxçuçayı çirkləndirdiyi üçün zaman-zaman Azərbaycanda müzakirə mövzusu olur.