Pakistanla Azərbaycan arasında imzalanmış 4,6 milyard dollarlıq hərbi razılaşmaya əsasən, Bakı 40 ədəd dördüncü nəsil “JF-17 Thunder” qırıcısı alacaq. Bu, Pakistanın tarixində ən böyük silah ixracı müqaviləsidir və Cənubi Qafqazda hərbi balansı ciddi şəkildə dəyişəcək.

Globalinfo.az xəbər verir ki, bu barədə “Forbes” jurnalının “How Armenia Might Respond To Azerbaijan’s JF-17 Fighter Acquisition” (“Ermənistan Azərbaycanın JF-17 qırıcısını almasına necə cavab verə bilər”) adlı məqaləsində qeyd olunur.

Əvvəllər 16 ədəd JF-17 alacağı gözlənilən Azərbaycan sonradan sifarişi 40-a çatdırıb. Yeni təyyarələr ən son versiya olan JF-17C Block III modelidir və aktiv fazalı radar sistemi və digər müasir silahlarla təchiz edilib.

Bu qırıcılar Azərbaycanın köhnə MiQ-29 və Su-25 təyyarələrindən ibarət hava qüvvələrini ciddi şəkildə gücləndirəcək. Əldə edilən məlumatlara görə, yeni qırıcılar mövcud təyyarələri dərhal əvəz etməyəcək. Son zamanlar Türkiyə silahları ilə təchiz edilən Su-25-lər hələlik xidmətini davam etdirəcək.

Risk analiz şirkəti “RANE”nin analitiki Sem Lixntenşteyn bildirib ki, JF-17-lər Azərbaycanın hərbi arsenalına həm maddi baxımdan sərfəli, həm də texnoloji baxımdan ciddi bir yüksəlişdir.

“Qərbin Rusiyaya tətbiq etdiyi sanksiyalar səbəbindən Moskvanın yeni silahlar təklif etmək qabiliyyəti sual altındadır. Bu şəraitdə Azərbaycan Pakistanla əməkdaşlığı gücləndirməklə həm də Rusiyadan asılılığı azaldır”, – deyə Lixntenşteyn vurğulayıb.

O əlavə edib ki, JF-17-lərin bir üstünlüyü də onların Türkiyənin mövcud silah sistemləri ilə uyğunluğudur.

Bu müqavilə Ermənistanda ciddi narahatlıq doğurur. Ermənistanın döyüş təyyarəsi arsenalı çox məhduddur – 2019-cu ildə Rusiyadan alınan 12 ədəd Su-30SM təyyarəsindən yalnız 4-ü təhvil verilib.

Rusiya xarici işlər naziri Sergey Lavrov son zamanlar Rusiyanın Ermənistana silah tədarükündəki gecikmələri Ukrayna müharibəsi ilə əsaslandırıb. Lakin buna baxmayaraq, o, İrəvanın Fransa ilə dərinləşən müdafiə əməkdaşlığını tənqid edərək bildirib ki, “bu əməkdaşlıq ciddi suallar doğurur”. Qeyd edək ki, Fransa yaxın zamanda Ermənistana “Caesar” özüyeriyən artilleriya qurğuları satıb – bu müqavilə həm Azərbaycan, həm də Rusiya tərəfindən tənqid olunub.

Bəzi analitiklər Ermənistana Fransadan “Rafale” təyyarələri almağı təklif etsə də, yüksək qiymətlər İrəvan üçün bu seçimi çətinləşdirir. Daha real ehtimal isə Hindistanda istehsal edilən Su-30MKI qırıcılarının alınmasıdır. Ermənistan artıq Hindistandan rekord həcmdə silah alıb və bu əməkdaşlığı genişləndirməyə çalışır.