Rusiya Prezidenti Vladimir Putinin son fikirləri diqqət çəkib. O, Kiyevə sülhün lazım olmadığını, hücumları davam etdirməkdə maraqlı göründüyün bildirib. Ukraynanın humanitar səbəblərdən, o cümlədən döyüş meydanında həlak olan hərbçilərin cəsədlərini toplamaq üçün 2-3 günlük atəşkəslə razılaşmaqdan imtina etməsini də bununla əlaqələndirib.

Ukraynanın keçirdiyi əməliyyatlar, Putinin bu istiqamətdə açıqlamaları fonunda sülh müqaviləsi dalana dirənib? Növbəti mərhələdə tərəfləri nə gözləyir?

Globalinfo.az-a açıqlamasında siyasi şərhçi Aydın Quliyev bildirib ki, Ukraynada sülhün perspektivi artıq uzun müddətdir ki, dalana dirənmiş vəziyyətdədir:

“Ukraynada baş verən proseslərin sülhlə nəticələnməsi üçün dünyada sınaqdan çıxmış üsullar tətbiq olunmalıdır. Bunlar uzunmüddətli atəşkəsin əldə edilməsi və hər iki ölkənin ərazi bütövlüyü və suverenliyinin nəzərə alınması şərtilə danışıqlar prosesinə başlanmasıdır. Təəssüf ki, sülhə nail olmağın bu iki variantdan başqa üçüncü yolu yoxdur. Bu yoldan kənar alternativ axtaranlar isə artıq indidən uğursuzluğa məhkumdurlar.

Rusiya isə uzunmüddətli atəşkəsə razı olmadığını dəfələrlə açıq şəkildə bəyan edib. Ukraynanın ərazi bütövlüyü və suverenliyinə hörmət prinsipi faktiki olaraq ortadan qalxıb. Rusiyanın təklif etdiyi “həll yolları” isə Ukraynanın faktiki olaraq təslim olmasından başqa bir anlam daşımır. Rəsmi Kiyevin BMT tərəfindən tanınan ərazilərdən – dörd vilayətdən imtina etməsi isə açıq-aşkar Ukraynanın ərazi bütövlüyünün və suverenliyinin pozulması deməkdir”.

Aydın Quliyevin sözlərinə görə, qısa müddətli atəşkəs təklifləri sülh yaratmaq baxımından real nəticə vermir:

“Bir tərəfdə sülh danışıqları aparılır, əsirlər dəyişdirilir, digər tərəfdə isə hərbi əməliyyatlar davam edir. Belə bir vəziyyətdə hansı sülhdən danışmaq olar? 2-3 günlük atəşkəslər, cəsədlərin götürülməsi, əsirlərin dəyişdirilməsi kimi addımlar iki ölkə arasında davamlı sülh yaratmaq gücündə deyil. Əksinə, Ukraynanı daha ağır və dəhşətli bir müharibə mərhələsi gözləyir”.