Ukrayna ordusu iyunun 1-də Murmansk, İrkutsk, İvanovo, Ryazan və Amur vilayətlərində yerləşən aerodromlara PUA-lardan istifadə edərək hücumlar həyata keçirib. Rusiya rəhbərliyi bu hücumları “qırmızı cizgilərin keçilməsi” kimi dəyərləndirərkən, bəzi rus ekspertlər və siyasətçilər artıq “nüvə silahı seçimi”ni açıq şəkildə müzakirə etməyə başlayıblar.

Globalinfo.az-a danışan politoloq Vəli Əlibəyov deyib ki, hazırda dünya nüvə müharibəsinin bir addımlığında olmasa da, bu təhlükə gündən-günə artır:

“Xüsusilə Ukraynanın Rusiya ərazisində həyata keçirdiyi “Hörümçək toru” adlı genişmiqyaslı dron əməliyyatı bu riski daha da artırır. Bu əməliyyat çərçivəsində Ukrayna fərqli istiqamətlərdən yüzlərlə dronla Rusiya ərazisindəki strateji obyektləri hədəfə aldı, hərbi aerodromlar, yanacaq anbarları, radar sistemləri və logistika mərkəzləri vuruldu. Dronlar elə Rusiya ərazisindən havaya qaldırıldı. Əlbəttə, bu zərbələr Rusiya rəhbərləyinə də, cəmiyyətinə də ciddi hərbi və psixoloji təsirsiz ötüşə bilməzdi.

Əminliklə demək olar ki, bu cür hücumlar Moskvanın “qırmızı xətləri”nə yaxınlaşır. Strateji əhəmiyyət daşıyan obyektlərin hədəfə alınması Rusiya tərəfindən milli təhlükəsizliyə birbaşa təhdid kimi qiymətləndirilə bilər. Belə vəziyyətlərdə nüvə silahları ilə bağlı ritorikanın sərtləşməsi riski də artır. Qeyd edək ki, onsuz da son zamanlar Rusiya rəhbərliyi, o cümlədən Vladimir Putin çıxışlarında tez-tez “hələ gücümüzü tam göstərməmişik”, “Rusiya istənilən vasitədən istifadə etməyə hazırdır” kimi üstüörtülü, amma mesaj dolu ifadələr işlədirdi. Dmitri Medvedev isə açıq şəkildə nüvə silahı ilə təhdid etməkdən çəkinmir”.

Ekspert hesab edir ki, dünya yeni mərhələyə qədəm qoyub:

“Qeyri-sabit, qarşılıqlı güvənin azaldığı, texnologiyanın müharibə alətinə çevrildiyi bir mərhələ ilə üz-üzəyik. Nüvə silahının aktiv döyüşə cəlb olunması hələ real görünməsə də, vəziyyətin bir anlıq emosional və ya siyasi qərarla təhlükəli istiqamətə sürüklənməsi mümkündür.

Bunları nəzərə alaraq, demək olar ki, hazırda dünya “nüvə müharibəsinə hamilədir”. Amma bu hamiləliyin doğuşla nəticələnib-nəticələnməməsi dövlətlərin, liderlərin və beynəlxalq ictimaiyyətin bu təhlükəni necə idarə etməsindən asılı olacaq”.