Ukraynanın aerodromlara hücumundan sonra Rusiyada bir sıra təhlükəsizlik tədbirləri görülür. İddialara görə, sərhəd-keçid məntəqələrində nəqliyyat vasitələri və sərnişinlərin ciddi yoxlanmasına başlanılıb. Qeyd olunur ki, məqsəd təhdidlərin qarşısını almaqdır. Azərbaycanın yükdaşıma bazarında Rusiya ilə əlaqələr mühüm yer tutduğu üçün hazırkı proses ölkəmizdə də narahatlıq yaradıb.

Bu gərginlik fonunda Azərbaycan-Rusiya sərhəddində nə kimi dəyişikliklər gözlənilə bilər? Proses ticarət və yükdaşımalara necə təsir edəcək?

Globalinfo.az-a danışan Liberal İqtisadçılar Mərkəzinin sədri Akif Nəsirli deyib ki, Rusiyanın iyunun 1-dən sonra dövlət sərhəd-keçid məntəqələrində apardığı yoxlamaların xüsusi səbəbləri var:

“Ukrayna ordusu Rusiyanın Murmansk, İrkutsk, İvanovo, Ryazan və Amur vilayətlərində yerləşən aerodromları elə onların ətrafında olan yük maşınlarının üzərindən buraxılan dronlarla atəşə tutub. Yəni PUA-lar Rusiyanın daxilinə gömrük buraxılış məntəqələrindən keçərək gəlib. Ona görə də rəsmi Moskva sərhəd keçid məntəqələrində yük maşınlarını yoxlamalıdır. Bu, vaxt itkisinə səbəb olacaq. Əvvəl bir tır Rusiyanın daxilinə 15-20 dəqiqəyə keçirdisə, indi 1 saat zaman lazımdır. Çox güman ki, yoxlamalar ilkin mərhələdə fiziki üsullarla aparılacaq, sonrakı mərhələlərdə mexaniki vasitələrdən istifadə ediləcək. Yük maşınlarının daxilində içini görmək üçün xüsusi qurğular quraşdırılacaq. Yalnız bundan sonra sərhədlərdə operativlik bərpa edilə bilər”.

Ekspert bildirib ki, son hadisə Kreml və tərəfdaşlarına ciddi zərər verəcək:

“Rusiyanın bütün keçid məntəqələrində 15-20 gün müddətinə böyük tıxac yaranacaq, malların çatdırılması prosesi uzanacaq, yük maşınları günlərlə növbədə dayanacaq. Bu ölkəyə daha çox tərəvəz məhsulları daşınır. Proses belə davam edərsə, məhsullar xarab ola bilər. Nəticədə sahibkarlar ziyana düşəcək. Həmçinin, Rusiya bazarlarında qıtlıq yaranacaq, ixracat azalacaq. Azərbaycan da müəyyən problemlər yaşayacaq. Rusiyadan keçid asan olsa da, bizim gömrükdə də yüklər ləngidilirdi. İndi bu, ikitərəfli olacaq, məhsullar çürüyəcək. Sahibkarlarımız bunu nəzərə almalıdırlar”.