Yunanıstan Türkiyənin Avropa Birliyinin müdafiə proqramlarında iştirakına mane olmaq üçün yeni addım atmağa hazırlaşır. Afina rəhbərliyi Ankaranın AB-nin müdafiə fondlarından yararlanması üçün “kazus belli” – yəni “müharibə səbəbi” qərarını ləğv etməsini tələb edir.

Axar.az xəbər verir ki, Yunanıstanın Baş naziri Kiryakos Miçotakis AB-nin üçüncü ölkələrlə hər hansı müdafiə razılaşması imzalaması üçün üzv ölkələrin yekdil razılığı tələb olunduğunu bildirib.

“Əgər Türkiyə bu proqramlarda yer almaq istəyirsə, bizim narahatlıqlarımızı da nəzərə almalıdır”, – Miçotakis vurğulayıb.

Baş nazirin sözlərinə görə, “kazus belli” qərarının üzərindən 30 il keçib və artıq bunun ləğvi zamanı çatıb:

“Bir tərəfdən AB-nin maliyyə imkanlarından yararlanmaq istəyirsən, digər tərəfdən isə AB üzvü bir ölkə hüququnu istifadə etsə, onu müharibə ilə hədələyirsən. Bu, mümkün deyil. Prezident Ərdoğanla münasibətlərimiz yaxşıdır, bu məsələni şəxsən onunla müzakirə edəcəyəm”.

Qeyd edək ki, Türkiyə Böyük Millət Məclisi 1995-ci ildə qəbul etdiyi qərarla Yunanıstanın Egey dənizində su sərhədini 6 mildən çox genişləndirməsini müharibə səbəbi kimi qiymətləndirib və bu halda hökumətə hərbi tədbirlər də daxil olmaqla bütün səlahiyyətləri verib.