Azərbaycanda minlərlə insan faktiki yaşadığı evdə rəsmi qeydiyyatda deyil. Bu vəziyyətin əsas səbəbləri evlərin kupçasız olması, ev sahiblərinin qeydiyyata icazə verməməsi və ya kirayə münasibətlərinin qeyri-rəsmi qurulmasıdır. Qeydiyyatsız yaşayan şəxslər isə bir sıra hüquqi və sosial çətinliklərlə üzləşirlər.

Bunlar nələr ola bilər?

Globalinfo.az-a danışan hüquqşünas Xəyal Bəşirov deyib ki, bu məsələ “Yaşayış yeri və olduğu yer üzrə qeydiyyat haqqında” qanunla tənzimlənir:

“Qanuna əsasən, insanların qeydiyyatda olduğu və faktiki yaşadığı yer mövcuddur. Bura həm azərbaycanlılar, həm əcnəbilər, həm də vətəndaşlığı olmayan şəxslər daxildir. Yaşayış yerini dəyişən vətəndaşlar 60 gündən artıq yaşayacaqları yer haqda 7 iş günü ərzində müraciət edib qeydiyyata düşməlidirlər. Çünki bu, həmin adamın daimi yaşadığı yeri dəyişməsi deməkdir. Qeydiyyatda olmayan şəxslər isə şəxsiyyət vəsiqəsi ala bilməzlər”.

Hüquqşünas əlavə edib ki, müvəqqəti qeydiyyata düşmək həmin adamın özünə lazımdır:

“Çünki bir çox xidmətlərdən ancaq yaşayış yeri üzrə bəhrələnmək mümkündür. Məsələn, hansısa arayışın alınması, tibbi və digər xidmətlər. Əgər insan həmin yerdə qeydiyyatda deyilsə, bu xidmətlərdən istifadə eləyə bilmir. Yaşayış yerini dəyişən şəxs yeni yaşayış yerində kirayə müqaviləsi və ya mülkiyyətçinin razılığı əsasında qala bilər. Belə halda, müvafiq icra hakimiyyətinə sənəd təqdim etməlidir. Təəssüf ki, insanlar yaşayış yerlərini dəyişdikdə, bu məsələləri önəmsəmirlər. Bu da çox ciddi problemlərə gətirib çıxarır. Hüquqi baxımdan pozuntulara yol verirlər. İnzibati Xətalar Məcəlləsinin müvafiq maddələrinə əsasən, qanunun pozulması halında həmin şəxslərə xəbərdarlıq olunur və 30 manat civarında cərimə tətbiq edilir”.