İran və Rusiya Federasiyası arasında münasibətlər daha da möhkəmlənəcək.

Publika.az xəbər verir ki, Rusiya prezidenti Vladimir Putin İranla hərtərəfli strateji tərəfdaşlıq haqqında sazişi ratifikasiya edən qanunu imzalayıb.

Bu sənəd 2025-ci il yanvarın 17-də İran prezidenti Məsud Pezeşkianın Moskvaya səfəri zamanı imzalanıb.

İndi Moskva və Tehran siyasət, müdafiə, iqtisadiyyat, təhlükəsizlik, ticarət, investisiya, enerji, infrastruktur, nəqliyyat və kommunikasiya sahələrində bərabərhüquqlu və qarşılıqlı faydalı əməkdaşlığı inkişaf etdirəcəklər.

Tərəflər Rusiya və İran ərazisindən keçən beynəlxalq nəqliyyat dəhlizlərinin inkişafı sahəsində əməkdaşlıq edəcəklər ki, bunlardan biri də strateji əhəmiyyətli “Şimal-Cənub”dur. Tərəflərdən biri qəfil təcavüzə məruz qaldıqda, digəri təcavüzkara yardım göstərməməyi, habelə beynəlxalq hüquq normaları əsasında yaranan hər hansı fikir ayrılığının həllinə köməklik göstərməyi öhdəsinə götürür.

Qeyd edək ki, Rusiya ilə İran arasında əvvəllər də yaxşı münasibətlər olub. Məsələn, 2024-cü ilin birinci rübündə ölkələr arasında rubl və rialla ticarət haqqında saziş imzalanıb. "Rosatom" üçün Buşəhr AES-in iki yeni blokunun tikintisi layihəsi davam edir və Rusiya və Belarusdan Fars körfəzindəki İran limanlarına logistika imkan verəcək Rəşt-Astara dəmir yolu xətti tikilir.