Qarabağda separatçılıq fəaliyyətləri ilə məşğul olanların məhkəməsində dəhşətli faktlar üzə çıxır. Məhkəmə iclaslarında təqdim olunan sübutlar, sənədlər, ifadələr Ermənistanın bölgədəki təcavüzkar siyasətini, Azərbaycan ərazilərində törədilən dağıntı və hüquq pozuntularını bir daha ortaya qoyur.

Ermənistan 30 il ərsində Azərbaycana vurduğu maddi və mənəvi ziyana görə təzminat ödəyə bilərmi? Buna yaxın tarixdə başqa ölkələrdə rast gəlinib.

Politoloq Tofiq Abbasov Globalinfo.az-a açıqlamasında bildirib ki, Qarabağ müharibəsinin baş verməsinə səbəb Ermənistanın təcavüzkar siyasəti olub:

“Qonşu ölkənin əsassız ərazi iddiaları nəticəsində bölgədə separatçı sistem formalaşdırıldı. Bu proses təkcə İrəvan tərəfindən deyil, eyni zamanda xaricdəki erməni diasporası tərəfindən də dəstəklənirdi. Dünya erməniləri birləşərək maddi və təşkilati resurslar toplayır, maliyyə marafonları keçirirdilər ki, mümkün olmayanı mümkün etsinlər. Məqsəd Azərbaycan torpaqlarını zor gücünə qoparıb Ermənistana birləşdirmək idi. Vəziyyətin gərginləşdiyini görəndə isə saxta şəkildə Qarabağ ermənilərinin “müstəqillik uğrunda mübarizəsi” mifini ortaya atdılar.”

Politoloq vurğulayıb ki, bu təxribatçı fəaliyyətlər mərhələli şəkildə həyata keçirilirdi:

“Əvvəlcə “Miatsum” ideyası irəli sürüldü. Daha sonra isə SSRİ-nin süqutu ilə yaranan siyasi xaosdan istifadə edərək, yeni bir ssenari quruldu. Guya Qarabağda yaşayan ermənilər müstəqil olmaq istəyirdilər. Bu iddia ilə çıxış edərək bölgədə silahlı toqquşmalara və genişmiqyaslı müharibəyə zəmin yaratdılar”.

Tofiq Abbasov qeyd edib ki, Azərbaycan bu münaqişədə həm insan itkisinə, həm də milyardlarla ziyana məruz qalıb:

“Əgər müharibənin səbəbkarı Azərbaycan olsaydı, bu hadisələr baş verməzdi. Hazırda Azərbaycan dövləti bu istiqamətdə hüquqi prosesi davam etdirir. Baş Prokurorluq, Ədliyyə Nazirliyi və digər aidiyyəti qurumlar tərəfindən zəruri sənədlər, sübut və faktlar toplanaraq beynəlxalq məhkəməyə təqdim olunacaq. Məqsədimiz odur ki, Azərbaycan tərəfinin müraciətləri obyektiv şəkildə qiymətləndirilsin və qəbul edilsin”.

Politoloqun sözlərinə görə, Ermənistan tərəfi bu hüquqi proseslərin gedişindən ciddi narahatdır və beynəlxalq aləmdə yanlış təsəvvür formalaşdırmağa çalışır:

“Onlar Avropa İttifaqında elə bir fikir yaratmaq istəyirlər ki, guya prosesləri Azərbaycan başladıb. Halbuki, bu tamamilə yanlışdır. Ermənistan silahlıları hələ 1980-ci illərin sonlarından Azərbaycana müdaxilələr etməyə başlamışdılar. O dövrdə sovet rəhbərliyi, xüsusilə Mixail Qarbaçov başda olmaqla, bu məsələlərə ya laqeyd yanaşırdı, ya da ümumiyyətlə reaksiya vermirdi. Bu laqeyd münasibət erməniləri daha da cəsarətləndirirdi”.

Tofiq Abbasov əlavə edib ki, Azərbaycan bütün bu prosesləri diqqətlə izləyir və hər bir hadisəni sənədləşdirir:

“Toplanan materiallar bir yerə cəmləndikdən sonra, təbii ki, Azərbaycan təzminat tələb edəcək. Ermənistan tərəfi isə özünü sanki arxayın hiss edir. Düşünürlər ki, guya Azərbaycan və Ermənistan barışıq yolu ilə beynəlxalq məhkəmələrə təqdim olunan iddiaları geri götürəcək. Bu isə qətiyyən mümkün deyil. Azərbaycanın 20 faiz torpağı illərlə işğalda qaldı, infrastruktur dağıdıldı, milli-mədəni abidələrimiz məhv edildi. Əgər Ermənistan bu itkilərin əvəzini ödəyə bilməyəcəksə, Azərbaycan bu prosesi öz gücü ilə həyata keçirəcək”.