Rusiyanın sülhməramlı kontingentinin Qarabağı tərk etməsi prosesinin başladılmasından bir il ötür. 2024-cü aprelin 16-da sülhməramlıların Azərbaycan ərazisindən çıxacağı açıqlanmış, bir gün sonra isə məlumat Kreml tərəfindən təsdiq edilmişdi. Beləliklə, iyunun 12-də sülhməramlıların Qarabağı tamamilə tərk etdiyi elan olundu.

Həmçinin ötən ilin aprel ayında Qazaxın işğalda olan Bağanıs Ayrım, Aşağı Əskipara, Xeyrimli və Qızılhacılı kəndlərinin Azərbaycana qaytarılması ilə bağlı Ermənistanla razılaşma əldə edildi. Hazırda isə demarkasiya prosesinin ikinci mərhələsi çərçivəsində Qazaxın digər 3 kəndi – Yuxarı Əskipara, Sofulu və Bərxudarlının təhvili üçün hazırlıq görüldüyünə dair Ermənistan KİV-də məlumatlar yayılır.

Maraqlıdır ki, mövcud proseslər fonunda sülh sazişinin mətni üzrə danışıqların yekunlaşmasına baxmayaraq, hələ də onun imzalanması üçün tarix və yer müəyyənləşməyib. Azərbaycan Prezidenti İlham Əliyev prosesin yekunlaşdırılması üçün Ermənistan Konstitusiyasının dəyişdirilməsi və ATƏT-in Minsk qrupunun ləğvi kimi məsələlərin həllini tapmalı olduğunu dəfələrlə vurğulayıb.

Globalinfo.az-a danışan siyasi şərhçi Aqşin Kərimov deyib ki, Prezident İlham Əliyevin verdiyi şifahi bəyanatlar və siyasi açıqlamalar, bağlı qapılar arxasındakı diktə doktrinası praktikada özünü isbat edib:

“Azərbaycanın milli təhlükəsizliyi, ərazi bütövlüyü və suverenliyi naminə qətiyyətində güclü sübutetmə alqoritmləri var.

Azərbaycan dövləti ölçülü və dəqiq hesablamalar apara bilən güclü strategiya aparatına malikdir. Prezident İlham Əliyev strateji hədəflərə doğru həm regional, həm də qlobal təhlükəsizlik arxitekturalarında koordinasiyanı müəyyənləşdirə bilir.

Dövlət başçısının Ermənistanla sülh gündəmində davamlı və sistemli yanaşmaları təkrarlamasına gəlincə, bunun perspektiv baxımından izahına nəzər yetirmək lazımdır.

Azərbaycanın strateji məqsədlərə doğru addımlarında əvvəlki illərdəki təcrübə regionda hegemonluq ambisiyaları ilə maraq quran oyunçulara meydan oxuyur. Bu, Azərbaycanla-Ermənistan arasında normallaşma səylərinə maneə yaradan qüvvələrə qarşı fəal müqavimət doktrinası formalaşdırır”.

A.Kərimovun sözlərinə görə, Bakı artıq Cənubi Qafqazdan Yaxın Şərq və Orta Asiyaya qədər uzanan alternativ güc dinamikalarına yaxşı rıçaqlar qazanır:

“Ermənistanın özü daxil onun himayədarı olan dövlətlər Azərbaycanın siyasətinə uyğun maraqlar yaratmalıdırlar. Əks təqdirdə, Azərbaycanın regionda ambisiya yaratmaq üçün münbit məkan olan Ermənistanı cəzalandırmaq metodları gündəmə gələ bilər. Qazaxın yerdə qalan 3 kəndi, həmçinin Naxçıvandakı Kərki kəndi, Zəngəzur dəhlizinin açılması, qərbi azərbaycanlıların qayıdışı üçün lazım ola biləcək təzyiq tətbiqi də bura daxildir”.