Aİ-nin xarici işlər və təhlükəsizlik siyasəti üzrə ali nümayəndəsi Kaja Kallas, Fələstinin baş naziri Məhəmməd Mustafa və Avropa İttifaqının Aralıq dənizi üzrə komissarı Dubravka Suica Lüksemburqda keçirilən Aİ-Fələstin Administrasiyasının Yüksək Səviyyəli Dialoq görüşündən sonra birgə mətbuat konfransı keçiriblər.

Publika.az xəbər verir ki, Kallas konfrans zamanı Qəzzada baş verən dəhşətli insan itkisi və dağıntılar səbəbiylə Fələstin xalqı ilə həmrəy olduğunu bildirib.

"Qəzzaya edilən yardımların tamamilə əngəllənməsini pisləyirik. İsrail humanitar yardımların çatdırılmasını tam şəkildə bərpa etməlidir”, - deyə o qeyd edib.

Kallas Fələstin xalqının Avropa İttifaqının dəstəyinə arxalana biləcəyini və bu səbəbdən Fələstinə 1,6 milyard avroluq maliyyə dəstəyi ayırdıqlarını açıqlayıb:

"Bugünkü görüşün əhəmiyyəti bundan qaynaqlanır. Avropa Birliyindəki 27 ölkə olaraq iki dövlətli həlli dəstəkləməyə razılaşdıq. Biz də bu iki dövlətin bərabərhüquqlu olmasının vacib olduğuna inanırıq. Fələstinlə Yüksək Səviyyəli Siyasi Dialoqu məhz buna görə keçiririk".

Fələstinin baş naziri Məhəmməd Mustafa da çıxışında Qəzza üçün həyati əhəmiyyət kəsb edən mövzularda hərəkətə keçməyin zamanı olduğunu bildirib. O, bu mövzuda Aİ ilə strateji tərəfdaşlıq qurmaq istədiklərini söyləyib.

Dubravka Suica Fələstinə veriləcək 1,6 milyard avroluq maliyyə yardımı haqqında ətraflı məlumat verib:

“Dəstək paketinin üç əsas sütunu var. 620 milyon avroluq qrantdan ibarət olan birinci hissə Fələstin rəhbərliyinin islahat gündəmini dəstəkləməyi hədəfləyir. 576 milyon avroluq qrantdan ibarət olacaq ikinci mərhələ iqtisadi canlanma və sabitliyi təşviq edəcək. Bu çərçivədə şərtlər yerinə yetirildikdə Qüds və Qəzzada müxtəlif sektorlardakı layihələr dəstəklənəcək. Üçüncü hissə isə Avropa İnvestisiya Bankı tərəfindən Fələstində özəl sektorun maliyyələşdirilməsi üçün veriləcək 400 milyon avroya qədər kreditdən ibarətdir”.