“The Wall Street Journal”ın (VSJ) yaydığı məlumata görə, Omanda keçirilən ABŞ-İran danışıqlarında tərəflər qırmızı xətlər və İranın nüvə proqramının ləğvi müqabilində sanksiyaların yumşaldılması variantlarını müzakirə ediblər. Tehran ABŞ sanksiyalarının yumşaldılmasını və Vaşinqtonun İran neftinin çinli alıcılarına təzyiqinə son qoymasını istəyib. Bunun müqabilində, 2015-ci ildə imzalanan nüvə razılaşmasına geri qayıtmağa hazır olduğunu bəyan edib.

İranın nüvə proqramı siyasətindən əl çəkməsi inandırıcı görünürmü?

Globalinfo.az-a danışan politoloq Yusif Bağırzadə deyib ki, İran və ABŞ arasında keçirilən Oman görüşü 2015-ci ildə Aİ, ABŞ və İran arasında baş tutan danışıqlardan xeyli fərqlənir:

“Artıq Oman görüşündə üçüncü tərəf kimi Avropa İttifaqı masa arxasında yer almır. Halbuki 2015-ci ildəki anlaşmada ABŞ və İran birbaşa təmasda deyildi. Hazırda isə vəziyyət tamamilə əksinədir və bunu rəsmi Vaşinqton da təsdiqləyir. İranın xarici işlər naziri Abbas Araqçı isə görüşün birbaşa keçirildiyinə dair hər hansı məlumat vermir.

Yayılan məlumatlara görə, Araqçı ilə Trampın xüsusi nümayəndəsi Stiv Uitkof arasında çox qısa bir görüş baş tutub. Görüş zamanı ABŞ tərəfindən İranın nüvə zənginləşdirmə proqramını dayandırması təklif olunub. Vaşinqtonla nə Tehranın proksi qruplaşmaları maliyyələşdirməsi, nə də ballistik raketlərin istehsalını dayandırması müzakirə olunub. İran da öz növbəsində ABŞ-a bəzi təkliflər irəli sürüb.

Nəticə etibarilə tərəflər danışıqlardan müsbət fikirlərlə ayrılsalar da, konkret razılaşma əldə olunmayıb. Gələn həftədən etibarən Oman görüşlərinin 2 ay müddətində intensiv şəkildə davam etdirilməsi planlaşdırılır. Formatın da eyni qalacağı gözlənilir. ABŞ İranı öz şərtlərini qəbul etməyə razı sala bilər. Oman görüşlərinin nəticəsiz qalacağını düşünmürəm.

Sözügedən görüşlər fonunda tərəflər artıq əsirlərin mübadiləsinə də başlayıblar”.