Azərbaycan Ordusunun mövqeləri yenidən atəşə tutulub. Müdafiə Nazirliyinin yaydığı məlumata görə, Aprelin 8-i saat 19:20-dən 22:30-dək Ermənistan Silahlı Qüvvələrinin bölmələri Basarkeçər rayonunun Qaraiman və Yuxarı Şorca yaşayış məntəqələri istiqamətlərində yerləşən mövqelərindən Azərbaycan Ordusunun mövqelərini atıcı silahlardan fasilələrlə atəşə tutub.

Digər tərəfdən Prezident İlham Əliyev ADA Universitetində keçirilən “Yeni dünya nizamına doğru” mövzusunda beynəlxalq forumda çıxışı zamanı bildirib ki, hazırda sülh müqaviləsi üçün top Ermənistandadır.

Sülh istiqamətində addım atmaq əvəzinə atəşkəs pozuntularının intensiv hal alması nəyə hesablanıb?

Globalinfo.az-a danışan hərbi ekspert Səxavət Məmməd bildirib ki, mart ayının ortalarından başlayaraq aprel ayına qədər atəşkəs intensiv şəkildə pozulur:

“Ermənistan Müdafiə Nazirliyi əvvəllər belə halların olmadığını qeyd edərək məlumatları təkzib edirdi. Sosial şəbəkələrdə isə şərti sərhəd istiqamətində yaşayan ermənilər bu barədə xəbərlər paylaşır, video görüntülər təqdim edirdi. Ardınca Ermənistan Müdafiə Nazirliyi artıq bu atəşkəs pozuntularının olduğunu etiraf etməyə başladı. Lakin bunun ciddi xarakter daşımadığını da vurğulayırdılar.

Müharibə bitdikdən sonra Azərbaycanın konkret şərtləri bəlli idi. Proses başladığı andan etibarən top Ermənistan tərəfindədir. Rəsmi Bakı bütün fikirlərini və tələblərini İrəvana göndərib. Ermənistan isə məsələni uzadır və fərqli istiqamətlərə yönəltməyə çalışır. Hələ də işğalda saxladığı Qazaxın kəndləri və Kərki ilə bağlı heç bir addım atmaq niyyətində deyil. Azərbaycan bu məsələni də ön plana çıxarmalıdır”.

Səxavət Məmməd qeyd edib ki, hazırkı Ermənistan hakimiyyəti sülh müqaviləsinin imzalanmasını istəmir:

“Regionda maraqlı olan dövlətlər var və onlar sülhün əldə olunmasını istəmirlər. Rusiya, İran, Fransa, ABŞ buna nümunədir. Böyük dövlətlər Cənubi Qafqaza bir region kimi baxırlar, ayrı-ayrı ölkələr kimi yox.

Əgər region uğrunda mübarizə hələ də davam edirsə, tərəflər arasında uzlaşma yoxdursa, sülh müqaviləsindən danışmaq hələ tezdir. Aprel və may ayları Cənubi Qafqaz üçün çox çətin keçəcək. ABŞ demək olar ki, İranı mühasirəyə alır. Dünyada heç bir münaqişə ocağı hələ ki sönmüş vəziyyətdə deyil. Əksinə, yeni, alovlana biləcək münaqişə ocaqları yaranmaqdadır.

Belə bir şəraitdə Azərbaycan və Ermənistan arasında sülh müqaviləsinin imzalanması real görünmür. Ermənistanın revanşist qrupları hələ də Qarabağdan və “Böyük Ermənistan” iddiasından əl çəkməyib. Proseslərin bu şəkildə inkişaf etməsi yaxın gələcəkdə, hətta bir neçə ay ərzində eskalasiyanın baş verməsinə səbəb ola bilər”.