Cümhuriyyət Xalq Partiyasının (CHP) sabiq rəhbəri Kamal Kılıçdaroğlunun yenidən CHP sədri seçilməsi ehtimalı gündəmdədir. İddialara görə, aprelin 6-da keçiriləcək növbədənkənar qurultayda Kılıçdaroğlu namizəd olacaq və onun seçilmə şansı çox yüksəkdir. Bəziləri isə hazırkı sədr Özgür Özəlin asanlıqla seçiləcəyini düşünürlər.

CHP-də nələr baş verir? Kılıçdaroğlunun sədrliyə qayıtması mümkündürmü və bu, partiya üçün nə mənaya gəlir?

Globalinfo.az-a danışan politoloq Samir Hümbətov deyib ki, hazırda CHP daxilində ciddi parçalanma var:

“Bu, Kamal Kılıçdaroğlu, Özgür Özəl məsələsi deyil. Kılıçdaroğlunun yenidən seçilməsinin nə qədər mümkün olacağı sual altındadır. Özgür Özəl və Kılıçdaroğlu CHP-ni əldə saxlaya biləcək ciddi simalar sayılmırlar. Ankara Böyükşəhər bələdiyyəsinin sədri Mənsur Yavaş da ciddi rəqib sayılır. Onun namizədliyini verəcəyi ehtimalı da yüksəkdir. İmamoğlunun da kifayət qədər böyük nüfuzu var. Özəl və ya Kılıçdaroğlunun seçilmə ehtimalı yarı-yarıyadır. Hər ikisi eyni nüfuza malik, bərabərranqlı şəxslər hesab olunurlar. Özəlin CHP rəhbəri seçilərkən topladığı səs elə də çox deyildi.

Kılıçdaroğlu sədr seçilərsə, böyük dəyişiklik olmayacaq. Hazırda Özgür Özəlin nüfuzu ciddi sarsılıb”.