İran və Ermənistanın xarici işlər nazirləri Abbas Əraqçı və Ararat Mirzoyan İrəvanda regional məsələləri müzakirə ediblər.

Qeyd olunub ki, iranlı nazir Ermənistana səfəri çərçivəsində erməni həmkarı ilə ikitərəfli münasibətlərə və Cənubi Qafqazdakı vəziyyətə dair məsələlər ətrafında fikir mübadiləsi aparıb.

Globalinfo.az-a danışan siyasi şərhçi Kənan Novruzov deyib ki, Abbas Əraqçı və Ararat Mirzoyan görüşündə bir çox mühüm məsələ müzakirə olunub:

“Gözlənildiyi kimi, başlıca müzakirə mövzusu Cənubi Qafqaz və baş verən son proseslər olub. İran son proseslər fonunda özünü oyundankənar hiss edir. Faktiki olaraq Rusiya, ABŞ, Türkiyə, Ermənistan-Azərbaycan danışıqlarını yaxından izlədiyi halda İranın bu imkanları çox azdır.

Tehran Cənubi Qafqazda oyundankənar vəziyyətdə qalmaq istəmir. Bunun üçün də bütün imkanlardan istifadə edir. Hələlik bu Ermənistan ilə təmaslar fonunda müşahidə edilir. Azərbaycan ilə təmaslar müəyyən məsafəlidir. Buna səbəb İran-Azərbaycan münasibətlərində yaşanan gərginlikdir. Tehran bir müddətdir ki, gərginliyi aradan qaldırmaq, münasibətləri normallaşdırmaq üçün aktiv diplomatik təmas qurur. Amma dediyim kimi, bu danışıqlarda Ermənistan məsələsindən bəhs edilmir.

Hesab edirəm Tehranın İrəvanla təması onu qane etmir. Buna görə də gələcəkdə Bakı ilə də təmasları intensivləşdirməyə cəhd edə bilər. Amma Azərbaycan təmkinli davranmalıdır. Çünki İran normallaşma prosesinə ciddi töhfə verə bilməz. Əksinə bunun qarşısını almağa çalışacaq.
Misal üçün A. Araqçı Ararat Mirzoyan ilə görüşdə yenə sərhədlərin toxunulmazlığını vurğulayıb. Ümumiyyətlə, bu ifadə belə özlüyündə Tehranın niyyətini açıq şəkildə ortaya qoyur. Çünki İran 30 illik işğal dövründə bir dəfə də olsun sərhədlərin toxunulmazlığından bəhs etməyib”.

Ekspert deyib ki, Abbas Əraqçı və Ararat Mirzoyan görüşündə ABŞ ilə münasibətlər və Yaxın Şərqdəki gərginlik müzakirə edilib:

“Tehranın işi getdikcə çətinləşir. İran belə demək mümkünsə axtarışdadır. Əraqçının türkiyəli həmkarı Hakan Fidanla telefon danışığından sonra Mirzoyanla görüşü diqqət çəkir.

Məsələ ondadır ki, İran Ermənistanın ABŞ-la strateji saziş imzalamasından narahatdır. Bunu özü üçün təhdid hesab edir. Mətbuata açıqlanmasa da böyük ehtimalla Araqçı Mirzoyandan bu sazişin təfərrüatlarını soruşub. Yəni ABŞ Ermənistan üzərindən İrana bu vəya başqa formada hücum edə bilərmi kimi məsələlər qapalı qapılar ardında müzakirə edilmiş ola bilər.

Yaxın Şərq məsələlərinə gəldikdə isə Suriyada Bəşər Əsədin devrilməsindən sonra İran üçün vəziyyət əsaslı surətdə dəyişdi. Ermənistan isə Türkiyə ilə birlikdə Suriyaya humanitar yardım göndərməyə başlayıb. Tehran bütün bunları yaxından izləyir və suallara cavab axtarır”.