Cümə günü axşam Ermənistanın Baş naziri Nikol Paşinyan Milli Məclisin hakim partiyadan olan deputatları ilə qapalı iclas keçirib.

Publika.az xəbər verir ki, bu barədə Ermənistan mətbuatı yazıb. Rəsmi açıqlamaya görə, qapalı iclasda Azərbaycanla davam edən sülh prosesi ilə bağlı müzakirələr aparılıb.

Mətbuat qapalı görüşün bəzi detallarını əldə edə bilib. Bildirilir ki, qapalı iclasda Paşinyan komanda üzvlərinə deyib ki, sülh prosesi nəticə vermir, Əliyev nə iddialardan, nə də dəhliz tələbindən əl çəkmir, bundan imtina etsək, müharibə qaçılmaz olacaq.

O vurğulayıb ki, bu barədə ictimaiyyəti fəal şəkildə məlumatlandırmaq lazımdır ki, hamı hər şeyi başa düşsün.

Ermənistan mətbuatı onu da bildirir ki, hakim komandanın üzvləri son vaxtlar sərhəd kəndlərinə, xüsusən də Sünikə səfərlər edir. Qeyd olunur ki, onların bu səfərlərdə əsas məqsədi yerli əhalini gələcəkdə baş verəcək proseslə bağlı məlumatlandırmaqdır.