Bakıda pensiyaya düzəlmək istəyən qadının başına iş gəlib. O, pensiya almaq üçün 25 min manat pul veribmiş...

Demokrat.az-ın Musavat.com-a istinadən xəbərinə görə, Pərvanə M. pensiyaya düzəlmək üçün Sabir A. adlı, əvvəlcədən tanımadığı şəxsə 25 min manat pul verib.

İstintaqla müəyyən edilib ki, Sabir A. yüksək vəzifədə işləyən şəxslərlə əlaqələrinin olduğunu deyərək pensiya məsələsini həll edəcəyini bildirib.

Zərərçəkmiş qadın deyib ki, pulu ələ keçiriləndən sonra müxtəlif bəhanələrlə aldadılıb:

"Mən Sabiri Vüqarın vasitəsi ilə tanımışam. Vüqar bizim mağazanın yanında təndir işlədirdi. Artıq işlər yaxşı getmirdi. Mağazanın kirayəsini də verə bilmirdim. Vüqar dedi ki, Sabir pensiya düzəldə bilir. Onun oğluna da düzəltmişdi. Mən də razılaşdım.

Sabir əvvəlcə məni inandırmaq üçün dedi ki, Səhiyyə Nazirliyindən zəng edəcəklər. Bir nəfər zəng edib özünü Orxan kimi təqdim etdi. Amma sonradan bəlli oldu ki, nazirlikdə işləmirmiş. Yalandan belə plan qurublar. Telefondakı yazışmalarımız qalır. Hamısında təsdiq edib ki, 25 mini məndən pensiya düzəltmək üçün alıb. Mənə başqa-başqa nömrələrdən zəng edirdi. Deyirdilər ki, guya pensiya kartım hazırdır. Uzun müddət belə yalanlar deyildi. Zəng edən özü imiş. Hər dəfə deyirdilər ki, pensiyam karta yığılır”.

Təqsirləndirilən Sabir bildirib ki, pensiya işini həll etmək üçün 7 min manat alıb. 9 min manat da borc alıb. Onun sözlərinə görə, qalan 9 min manat verilmiş pula görə hesablanan faizdir. O deyib ki, pensiya düzəltmək üçün heç bir vəzifəli tanışı olmayıb.

Binəqədi Rayon Məhkəməsi Sabir barəsində hökm çıxarıb. Hökmə əsasən, onun barəsində 3 il azadlıqdan məhrumetmə cəzası təyin edilib.